Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 226 Hüküm no: 305 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin zimmînin Nikefor zimmîye açtığı alacak davasında sulh olduğu 132 guruşa sulh Ma‘rûz Derûn-ı arzuhâlde mastûrü’l-ism Artin v. Ohannes zimmî İstanbul Bâb Mahkemesi’nde meclis-i şer‘-i hatîrde arzuhâl eden Nikefor v. Artin nâm zimmî muvâcehesinde mersûm Nikefor zimmî zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği otuz iki buçuk guruş ve Sucukçuluk ücretimden dahi iki yüz yetmiş guruş ki cem‘an üç yüz iki buçuk guruş alacağım olmağla meblağ-ı mecmû‘-ı mezkûru Nikefor zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn zimmî-i mersûm ile bi’t-tav‘ ve’r-rızâ yüz otuz iki guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz otuz iki guruşu müdde‘î-i mesfûr Artin zimmîye edâsıyla mesfûr Nikefor zimmîye tenbîh olunduğu huzûr-ı [âlîlerine i‘lâm olundu] Fî 28 Zilka‘de sene [12]55