Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 226 Hüküm no: 306 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Mehmed’in boşandığı hanımı Zenciye Fâtımatüzzehra’ya mehrini ödemesi 101 guruş hüküm Ma‘rûz İstanbul’da Kocamustafapaşa kurbünde Canbâziye mahallesinde sâkine mu‘arrefetü’z-zât Zenciye Fâtımatüzzehrâ Kadın bt. Abdullah İstanbul Bâb Mahkemesi’nde meclis-i şer‘de zevc-i sâbıkı Kayıkçı Mehmed b. Ahmed nâm kimesne muvâcehesinde mezbûr Mehmed yüz bir guruş mehr-i müeccel tesmiyesiyle zevc-i dâhilim iken bundan akdem beni tatlîk etmekle mezbûrun zimmetinde mehr-i müeccel-i mezkûrum olan yüz bir guruşu bana edâya mezbûr Mehmed’e tenbîh olunmak matlûbumdur deyü da‘vâ ettikde ol dahi cevâbında müdde‘iyye-i mezbûre ol mikdâr guruş mehr-i müeccel tesmiyesiyle zevce-i menkûha-i medhûlün-bihâsı olduğunu ber-vech-i muharrer tatlîkini ikrâr lâkin mehr-i müeccel-i mezkûr yüz bir guruşu <> tatlîk eylediğim hînde zevcem müdde‘iyye-i mezbûreye tamâmen edâ ve teslîm etmişidim deyü müdde‘iyye-i mezbûrenin inkârına mukārin eylediği def‘ini isbâtdan ızhâr-ı acz edip bi’t-taleb mezbûr[e] Fâtımatüzzehrâ Kadın’a bi’l-muvâcehe yemîn verilmeğin mûcebince dâfi‘-i merkūm Mehmed def‘-i mezkûruyla mezbûre Fâtımatüzzehrâ Kadın’a bilâ-beyyine mu‘ârazadan ba‘de’l-men‘ mezbûr Mehmed’in sâlifü’l-beyân ikrârıyla lâzım gelen mehr-i müeccel-i mezkûr yüz bir guruşu zevcesi müdde‘iyye-i mezbûre Fâtımatüzzehrâ Kadın’a edâ ve teslîme merkūm Mehmed’e tenbîh olunduğu huzûr-ı [âlîlerine i‘lâm olundu] Fî 27 Zilka‘de sene [12]55