Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 244 Hüküm no: 336 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin hanımı Şerife Kâmile Hatun’a olan mehir bedelini ödemesi 250 guruş mu‘accel hüküm Ma‘rûz Mahrûse-i Galata’da Okçumustafa mahallesinde sâkine mu‘arrefetü’z-zât Şerife Kâmile bt. Veliyyüddin nâm hatun İstanbul Bâb Mahkemesi’nde meclis-i şer‘de hâlâ zevci Mustafa b. Mehmed nâm kimesne muvâcehesinde ben bundan akdem nefsimi iki yüz elli guruş mehr-i mu‘accel ve iki yüz elli bir guruş mehr-i müeccel tesmiyeleriyle mezbûr Mustafa’ya tezvîc ve tenkîh eylediğimde ol dahi tezevvüc ve duhûl edip lâkin mu‘accel-i mezkûrumu henüz bana edâ ve îfâ etmemekle suâl olunup mehr-i mu‘accel-i mezkûrumu bana edâya zevcim mezbûr Mustafa’ya tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr ü i‘tirâf etmeğin mûcebince mehr-i mu‘accel-i mezkûr iki yüz elli guruşun zevcesi müdde‘iyye-i mezbûre Şerife Kâmile Hatun’a edâsıyla mezbûr Mustafa ilzâm olunduğu mübâşirleri Dîvân-ı âlî çavuşlarından Arabgirli Ahmed Çavuş kulları yediyle huzûr-ı [âlîlerine i‘lâm olundu] Fî 21 Zilhicce sene 1255