Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 244 Hüküm no: 337 Orijinal metin no: [44b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un eşya bedelinden alacak talebiyle Fesçi Hüseyin’e açtığı davada sulh olduğu Eşyâ kıymetinden 250 [150] guruş hüküm Ma‘rûz İstanbul’da Horhor kurbünde Sofular mahallesinde sâkine mu‘arrefetü’z-zât Emine bt. Mustafa nâm hatun İstanbul Bâb Mahkemesi’nde meclis-i şer‘-i münîrde Fesçi Hüseyin b. Ali nâm kimesne muvâcehesinde ben işbu târîh-i i‘lâmdan beş ay mukaddem merkūm Hüseyin’in yedine li-ecli’l-hıfz mâlımdan îdâ‘ ve teslîm eylediğim mecmû‘u iki yüz elli guruş kıymetli yedi sahan ma‘a kapak ve iki ihrâm ve altı tabak ve bir tenceremi bi-gayri hakkın fuzûlî âhara bey‘le istihlâk etmekle kıymet-i mezkûresi olan iki yüz elli guruşu merkūm Hüseyin’den tazmîn taleb ederim deyü tasaddî eylediğim da‘vâmdan bâ-tavassut-ı [muslihîn] mezbûr Hüseyin ile <> bi’t-tav‘ ve’r-rızâ yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz elli guruşun müdde‘iyye-i mezbûre Emine Hatun’a edâ ve teslîmiyle mezbûr Hüseyin ilzâm olunduğu mübâşirleri Bâb-ı Seraskerî kavaslarından el-Hâc Mehmed Kavas kulları yediyle huzûr-ı [âlîlerine i‘lâm olundu] Fî 5 Zilhicce sene 1255