Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 254 Hüküm no: 353 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın boşadığı hanımı Şerife Hasna Hatun’a kalan nafaka borcunu ödemesi Nafaka ve mehr-i mu‘acceleden 160 guruş hüküm Ma‘rûz İstanbul’da Kumkapı kurbünde Tavâşî Süleymanağa mahallesinde sâkine mu‘arrefetü’z-zât Şerife Hesna bt. el-Hâc Hüseyin nâm hatun İstanbul Bâb Mahkemesi’nde meclis-i şer‘de zevc-i sâbıkı Ahmed b. Ahmed nâm kimesne muvâcehesinde mezbûr Ahmed Ağa ile mukaddemâ zevciyyet beynimizde kāime iken mezbûrun firâşından hâsıl batnımda müstebîn hamlim olmağla vaz‘-ı haml ile iddetim münkaziye oluncaya değin nafakam için zevcim mezbûr üzerine takdîr olunan beher şehr kırkar guruşdan bin iki yüz elli beş senesi şehr-i Rebî‘ülevveli’nin yirmi dördüncü gününden işbu târîh-i i‘lâma gelince dokuz ayda zevcim mezbûrun zimmetinde müctemi‘ bi’l-mürâca‘a alacak hakkım olan üç yüz altmış guruşun iki yüz guruşunu mukaddemâ mezbûrun yedinden kabz ve istîfâ etmemle bâkīsi olan yüz altmış guruşu mezbûr Ahmed Ağa’dan bi’l-mürâca‘a taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı bâkī-i mezkûru müdde‘iyye-i mezbûreye tamâmen edâ ve teslîm etmişidim deyü müdde‘iyye-i mezbûrenin inkârına mukārin eylediği def‘ine ikāmet-i beyyine edemeyip bi’t-taleb mezbûre Şerife Hasna Hatun’a bi’l-muvâcehe vech-i şer‘î üzere yemîn verilmeğin mûcebince dâfi‘-i merkūm def‘-i mezkûruyla mezbûre Şerife Hasna Hatun’a bilâ-beyyine mu‘ârazadan ba‘de’l-men‘ merkūm Ahmed Ağa’nın ve sâlifü’l-beyân ikrârıyla lâzım gelen meblağ-ı mezkûr yüz altmış guruşun müdde‘iyye-i mezbûre Şerife Hasna Hatun’a edâsıyla merkūm Ahmed Ağa ilzâm olunduğu tescîl ve bi’l-iltimâs huzûr-ı [âlîlerine i‘lâm olundu] Fî 25 Zilhicce sene [12]55