Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 253 Hüküm no: 352 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mehmed’in hanımı Fâtıma Hatun’a olan mehir bedelini ödemesi 350 guruş hüküm Ma‘rûz İstanbul’da Cumartesipazarı kurbünde Hocahayreddin mahallesinde sâkine mu‘arrefetü’z-zât Fâtıma bt. Bilal nâm hatun İstanbul Bâb Mahkemesi’nde meclis-i şer‘-i münîrde zevc-i dâhili Berber Mehmed b. Memiş nâm kimesne muvâcehesinde ben bundan akdem nefsimi üç yüz elli guruş mehr-i mu‘accel ve üç yüz guruş mehr-i müeccel tesmiyeleriyle mezbûr Mehmed’e tezvîc ve tenkîh eylediğimde ol dahi ber-vech-i muharrer tezevvüc ve duhûl edip lâkin mehr-i mu‘accel-i mezkûrumu zevcim merkūm henüz bana edâ ve îfâ etmemekle suâl olunup mehr-i mu‘accel-i mezkûr üç yüz elli guruşu bana edâya zevcim mezbûr Mehmed’e tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu tâyi‘an ve kat‘iyyen ikrâr ü i‘tirâf etmeğin mûcebince mehr-i mu‘accel-i mezkûr üç yüz elli guruşu müdde‘iyye-i mezbûre Fâtıma Hatun’a edâ ve teslîme merkūm Mehmed’e tenbîh olunduğu bi’l-iltimâs huzûr-ı [âlîlerine i‘lâm olundu] Fî 27 Zilhicce sene [1]255