Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 255 Hüküm no: 355 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbişzade Mehmed Salih Efendi’nin bahçe ve anbar yerindeki hissesini Ahmed Ağa’ya sattığı Ma‘rûz Vilâyet-i Anadolu’da Kastamonu sancağında Akkaya kazâsı ahâlîsinden derûn-ı arzuhâlde ismi mezkûr İbişzâde Mehmed Salih Efendi b. Ahmed nâm kimesne İstanbul Bâb Mahkemesi’nde meclis-i şer‘-i münîrde kazâ-i mezkûr ahâlîsinden sâhib-i arzuhâl Osman oğlu Ahmed b. Mehmed nâm kimesne muvâcehesinde es-Seyyid Mehmed Ağa b. Mustafa nâm kimesne hâzır olduğu hâlde kazâ-i mezbûrede Küplüözü nâm mahâlde kâin ma‘lûmü’l-hudûd bir kıt‘a bahçe ve bir anbar yerinin üç sehm i‘tibârıyla bir sehmi benim ve bir sehmi merkūm Ahmed Ağa’nın ve bir sehmi dahi hâzır-ı mezbûr es-Seyyid Mehmed Ağa’nın iştirâken ve şâyi‘an bâ-temessük-i sâhib-i ar[z] uhde-i tasarrufumuzda olmağla sâlifü’z-zikr bahçe ve anbar yerinden ber-vech-i muharrer mutasarrıf olduğum bir sehm hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile müşterekim mezbûr Ahmed Ağa’ya beş yüz kırk guruş bedel mukābelesinde bâ-ma‘rifet-i sâhib-i arz ferâğ ve tefvîz eylediğimde ol dahi ber-vech-i muharrer teferruğ ve kabûl eylediğinden sonra bedel-i mezkûr beş yüz kırk guruşu mezbûr Ahmed Ağa bana def‘ ü teslîm ve umûruma sarfla istihlâk <> eylediğinde ben dahi yedinden ahz u kabz ve umûruma sarfla istihlâk etmemle bi’l-cümle husûs-ı mezkûra ve bedel-i müstehlek-i merkūmun istirdâdına müte‘allika da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fîmâ-ba‘d mârrü’l-beyân bahçe ve anbar <> yerinde benim kat‘â alâka ve medhalim kalmayıp ber-minvâl-i muharrer bir sehmi mukaddemâ ve bir sehmi dahi hâlâ ki cem‘an iki sehmi mezbûr Ahmed Ağa’nın dâhil-i havza-i tasarrufu olmuşdur deyü mukırr-ı mezbûr Mehmed Salih Efendi’nin bi’l-cümle kelimât-ı meşrûhasını mezbûr Ahmed Ağa ile ve hâzır-ı merkūmdan her birinin tasdîk eyledikleri huzûr-ı [âlîlerine i‘lâm olundu] Fî 5 Zilhicce sene [12]55