Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 256 Hüküm no: 356 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Zahari ile Dimitri’nin birbirlerinde olan alacak davalarında sulh oldukları 500 guruşa sulh Ma‘rûz Bakkāl tâifesinden sâhib-i arzuhâl Zahari v. Nikola nâm zimmî İstanbul Bâb Mahkemesi’nde meclis-i şer‘-i hatîrde tâife-i merkūmeden derûn-ı arzuhâlde mastûrü’l-ism Dimitri v. Yani nâm zimmî muvâcehesinde mersûm Dimitri zimmî zimmetinde işbu yedimde olup mîlâd-ı İseviyye’nin bin sekiz yüz otuz beş senesi Martı’nın yedinci günü târîhiyle müverrah Rûmiyyü’l-imlâ bir kıt‘a temessük nâtık olduğu üzere cihet-i karzdan bin beş yüz guruşdan bâkī altı yüz on guruş alacağım olmağla taleb ederim deyü da‘vâ eylediğimde ol dahi cevâbında ikrâr lâkin benim senin zimmetinde beher vakıyyesi üçer buçuk guruşa olarak mâlımdan ve yedimden iştirâ ve kabz eylediğin yüz vakıyye folyos? ta‘bîr olunur balık semeninden alacak hakkım olan iki yüz elli guruşu taleb ederim deyü inkârıma mukārin benden da‘vâ ve ol vechile beynimizde ba‘de vukū‘i’l-münâza‘a muslihûn tavassutuyla beynimiz tevfîk ve ıslâh olunup ben tasaddî eylediğim meblağ-ı mezkûr altı yüz on guruş da‘vâmdan mersûm Dimitri zimmî ile bi’t-tav‘ beş yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra müte‘allika âmme-i da‘vâdan ben mesfûr Dimitri zimmînin zimmetini ol dahi benden iddi‘â eylediği meblağ-ı mezkûr iki yüz elli guruşdan meccânen fâriğ olup meblağ-ı mezkûr mutâlebesine ve bi’l-cümle husûs-ı mezkûra müte‘allika âmme-i da‘vâdan benim zimmetimi her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr beş yüz guruşun müdde‘î-i mersûm Zahari zimmîye edâsıyla mersûm Dimitri zimmî ilzâm olunduğu huzûr-ı [âlîlerine i‘lâm olundu] Fî 20 Zilhicce sene [1]255