Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 268 Hüküm no: 378 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cerrah Edhem Ağa’nın Kasap Mehmed ile ortağı Mehmed’e olan borcunu ödemesi 630 guruş hüküm Ma‘rûz Sâhib-i arzuhâl Kasab Mehmed b. Halil ve şerîki diğer Mehmed b. Mansur nâm kimesneler İstanbul Bâb Mahkemesi’nde meclis-i şer‘de derûn-ı arzuhâlde ismi mezkûr Cerrâh Edhem Ağa b. Ali nâm kimesne muvâcehesinde bundan akdem merkūm Edhem Ağa zimmetinde mâl-ı müşterekimizden iştirâ ve kabz eylediği vezn ve fiâtı beynimizde ma‘lûm lahm-ı ganem semeninden ba‘de külli’l-hesâb gayr-ı ez-teslîmât sahhu’l-bâkī altı yüz otuz guruş alacak hakkımız olmağla meblağ-ı bâkī-i mezkûr altı yüz otuz guruşu merkūm Edhem Ağa’dan hâlâ taleb ederim [ederiz] deyü da‘vâ ettiklerinde ol dahi cevâbında ikrâr lâkin ben deynim olan meblağ-ı bâkī-i mezkûr altı yüz otuz guruşun yüz otuz guruşunu nakden edâ ve müdde‘iyyân-ı merkūmân zimmetlerinde çuka semeninden alacağım olan üç yüz guruşu dahi deynim olan meblağ-ı mezkûrun ol mikdârına takās ve mahsûb edip ol vechile müdde‘iyyân-ı merkūmâna zimmetimde iki yüz guruş deynim kalmışdır deyü müdde‘iyyân-ı merkūm[ân]ın inkârlarına mukārin eylediği def‘lerine ikāmet-i beyyine edemeyip bi’t-taleb müdde‘iyyân-ı merkūmân Mehmed ve diğer Mehmed bi’l-muvâcehe vech-i şer‘î üzere tahlîf olunmağın mûcebince mezbûr Edhem Ağa def‘-i mezkûruyla bilâ-beyyine mu‘ârazadan ba‘de’l-men‘ ikrâr ü i‘tirâfı mûcebiyle meblağ-ı bâkī-i mezkûr altı yüz otuz guruşu müdde‘iyyân-ı merkūmân Mehmed ve diğer Mehmed Ağa’ya edâ ve teslîme merkūm Edhem Ağa’ya tenbîh olunduğu huzûr-ı [âlîlerine i‘lâm olundu] Fî 3 Muharrem sene [12]56