Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 268 Hüküm no: 377 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İlya’ya borcu olan Terzi Mihal’in borcunu ödemesi Ma‘rûz Bakkāl tâifesinden İlya v. Anaştas nâm zimmî İstanbul Bâb Mahkemesi’nde meclis-i şer‘-i münîrde derzi tâifesinden Mihal v. Todori nâm zimmî muvâcehesinde mersûm Mihal zimmî ile şerîki gāib ani’l-meclis Dimitri nâm zimmî zimmetlerinde bundan akdem mâlımdan ve yedimden bi’l-ma‘iyye iktirâz ve kabz ve umûruna sarfla istihlâk eyledikleri beş [yüz] guruş alacak hakkım olmağla meblağ-ı mezkûrdan gāib-i mesfûrun hissesi olan iki yüz elli guruşu mukaddemâ gāib-i mesfûrun yedinden <> kabz ve istîfâ etmemle bâkīsi olup mersûm Mihal zimmînin hissesi olan iki yüz elli guruşu mersûm Mihal zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben bundan akdem şerîkim gāib-i mesfûr ile hesâbımızı rü’yet eylediğimiz hînde müdde‘î-i mesfûra deynim olan meblağ-ı mezkûr iki yüz elli guruşu ver deyü şerîkim gāib-i mesfûra emr etmemle öyle olacak müdde‘î-i mersûm meblağ-ı mezkûr iki yüz elli guruşu şerîkim gāib-i mesfûrdan mutâlebe eylesin deyü eylediği kelâmı def‘e sâlih cevâb-ı şer‘î olmamağla iltifât olunmayıp alâ-mûcibi ikrârihi meblağ-ı mezkûr iki yüz elli guruşu müdde‘î-i mersûm İlya zimmîye edâ ve teslîme mesfûr Mihal zimmîye tenbîh olunduğu mübâşirleri Ahıskalı Hasan Kavas [kulları yediyle huzûr-ı âlîlerine i‘lâm olundu] Fî 8 Rebî‘ülevvel sene 1256