Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 269 Hüküm no: 380 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Osman Ağa’nın boşandıkları hanımı Emine’ye zevciyet muamelesi için yaptığı müdahaleden men edildiği Tatlîk Ma‘rûz İstanbul’da Balat kurbünde Tahtaminare mahallesinde sâkine mu‘arrefetü’z-zât Emine bt. Hüseyin nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı derûn-ı arzuhâlde mezkûrü’l-ism Esirci Osman Ağa b. Ahmed nâm kimesne muvâcehesinde mezbûr Osman Ağa yüz guruş mehr-i müeccel tesmiyesiyle zevc-i dâhilim iken sene-i sâbıkā Şevvâli’l-mükerreminin yedinci günü mahalle-i mezbûrede beni bâinen tatlîk etmekle zimmetinde mütekarrir ve ma‘kūdün-aleyh mehr-i müeccel-i mezkûrum olan yüz guruşu bana edâya ve iddetim inkızâsına değin beni infâka zevcim mezbûrdan sene-i mezbûre Zilka‘detü’ş-şerîfesinin selhi günü İstanbul’da Mahmudpaşa Mahkemesi’nde huzûr-ı hâkimü’ş-şer‘de da‘vâ eylediğimde ol dahi cevâbında ol mikdâr mehr-i müeccel tesmiyesiyle zevce-i menkûha-i medhûlün-bihâsı olduğumu ve vech-i meşrûh üzere tatlîkini ikrâr etmeğin mûcebince mehr-i müeccel-i mezkûrum olan yüz guruş ile nafaka-i iddet-i bakıyye-i ma‘lûmem ve me’ûnet-i süknâm mukābelelerinde bi’t-terâzî beynimizde ta‘yîn olunan iki yüz guruş ki cem‘an üç yüz guruşu zevcim mezbûr mahkeme-i mezbûrede meclis-i şer‘de bana def‘ ü teslîm ben dahi yedinden bi’t-tamâm ve’l-kemâl ahz u kabz edip bi’l-cümle hukūk-ı zevciyyete ve sâir cemî‘ hukūk-ı şer‘iyyeye müte‘allika âmme-i de‘âvîden tarafeynden her birimiz âharın zimmetini kabûlü hâvî ibrâ eylediğimizi mübeyyin yedimize bir kıt‘a hüccet i‘tâ olunmuşiken mezbûr Osman Ağa bana mu‘âmele-i zevciyyet irâdesiyle müdâhaleden hâlî olmamağla men‘ olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihâ tasdîk ve i‘tirâf etmeğin mûcebince mezbûr Osman Ağa’nın mezbûre Emine Hatun’a ber-minvâl-i muharrer vâki‘ olan müdâhalesi men‘ olunmak iktizâ eylediği huzûr-ı [âlîlerine i‘lâm olundu] Fî-gurreti Muharrem sene [1]256