Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 270 Hüküm no: 381 Orijinal metin no: [50b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın daha önce ödediği borcunu geri vermesi talebiyle İbrahim Efendi’ye açtığı davanın reddedildiği Bî-vech-i şer‘î mu‘ârazadan men‘ Ma‘rûz Etbâ‘dan Midillili el-Hâc Mustafa Ağa b. Ali nâm kimesne İstanbul Bâb Mahkemesi’nde meclis-i şer‘-i münîrde Karahisar-ı Nallı kazâsı ahâlîsinden İbrahim Efendi b. Mehmed nâm kimesne muvâcehesinde merkūm es-Seyyid İbrahim Efendi yedinde olup sene-i sâbıkā Zilhiccetü’ş-şerîfesi’nin yedinci günü târîhiyle müverrah İstanbul’da Mahmudpaşa Mahkemesi’nden i‘tâ ve işbu meclis-i şer‘de ibrâz ve kırâat olunan bir kıt‘a i‘lâm-ı şer‘îde tafsîl ü beyân olunduğu üzere cihet-i karzdan inkârıma mukārin benden beş yüz elli guruş da‘vâ ve müdde‘âsını lede’t-tezkiye adl ve makbûlü’ş-şehâde idikleri ihbâr olunan Ebubekir b. Veliyyüddin ve Mehmed b. Hüseyin nâm kimesneler şehâdetleriyle muvâcehemde vech-i şer‘î üzere ba‘de’l-isbât ve’l-hükm meblağ-ı mahkûmün-bih-i mezkûr beş yüz elli guruşu benden tahsîl ve ahz u kabz etmişidi el-hâletü hâzihî mezbûr İbrahim Efendi’nin benim zimmetimde aslâ ve kat‘â hakkı olmayıp ve şâhidân-ı mezbûrân dahi benim ma‘rûfum olan kimesnelerden olmamağla merkūm İbrahim Efendi ber-minvâl-i muharrer müdde‘âsını tekrâr muvâcehemde şuhûd-ı âhar ile isbât yâhûd me’hûzu olan meblağ-ı mezkûru bana geri redd ü teslîm eylesin deyü takrîr-i meşrûhu üzere tasaddî eylediği da‘vâsı meşrû‘a olmamağın <> mûcebiyle kelâmına iltifât olunmadığı mübâşirleri Bâb-ı Seraskerî kavaslarından Nevşehirli Osman Kavas kulları yediyle huzûr-ı [âlîlerine i‘lâm olundu] Fî 29 Zilhicce sene [1]255