|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 120 Hüküm no: 103 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Tavşanlı nâhiyesi Tepecik köyündeki Numan Dede’nin yaptırdığı caminin imamı Hafız Ali b. Mehmed’in görevini torunu Halil b. Hüseyin’e bırakması
Ma‘rûz,
Sâdır olan fermân-ı âlîlerine imtisâlen işbu arzuhâl [ve] derkenâra nazar olundukda vilâyet-i Anadolu’da medîne-i Kütahya kazâsına muzâfe Tavşanlı nâhiyesinde Tepecik karyesinde Numan Dede nâm sahibü’l-hayrın binâ eylediği câmi‘-i şerîfinde imâmet cihetine mutasarrıf olan Hâfız Ali b. Mehmed müsinn ü ihtiyâr olup edâ-i hizmetden âciz olduğundan hüsn-i rızâsıyla hafîdi Halil b. Hüseyin dâ‘îlerine kasr-ı yedinden tevcîh ve yedine berat-ı şerîf-i âlîşân i‘tâ kılınması[nı] işbu arzuhâl ile istid‘â eder, fi’l-hakīka cihet-i mezkûre sahib-i arzuhâl mezbûr Hâfız Ali’nin üzerinde olduğu derkenârdan müstebân ve merkūm Hâfız Ali’nin sahib-i berat olduğunu, hafîdi merkūm Halil b. Hüseyin her vechile ehliyet ve istihkākı kazâ-i mezbûr ahâlîsinden bu esnâda Der-aliyye’ye gelen erbâb-ı vukūfdan Adaoğlu Halil b. Osman ve Han Yusufoğlu Hacı Ahmed b. Hüseyin nâm kimesnelerin alâ-tarîkı’ş-şehâde ihbârlarıyla mütehakkık olmağın bu sûretde merkūm Hâfız Ali’nin ferâğat ve kasr-ı yed edip atîk beratını teslîm etmekle imâmet-i mezkûre fâriğ-i merkūmun kasr-ı yedinden hafîdi merkūm Halil b. Hüseyin’e tevcîh ve atîk beratı kaleminden battala hıfz olunarak yedine müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr.
|