Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 283 Hüküm no: 402 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küfeci Sabatay’ın Barutçuoğlu Hüseyin’e açtığı tazminat davasının hukuksuz bulunarak reddedildiği Mu‘ârazadan men‘ Ma‘rûz Küfeci Sabatay v. İsak nâm Yahûdi İstanbul Bâb Mahkemesi’nde meclis-i şer‘de Barutçuoğlu es-Seyyid Hüseyin b. Ali nâm kimesne muvâcehesinde ben târîh-i i‘lâmdan yirmi sekiz gün mukaddem mâlımdan mecmû‘u bin altı yüz guruş kıymetli sekiz fıçı pekmez ve elli yedi keyl cevizimi medîne-i Mudanya İskelesi’nden Âsitâne-i aliyye’ye getirmek için gāib ani’l-meclis rüesâ-yı sefâinden Kara İsmail nâm kimesnenin sefinesine tahmîl eylediğimden sonra esnâ-i râhda fırtınaya uğrayıp gāib-i merkūm zikri mürûr eden pekmez ve cevizimi deryâya ilkā ve mezbûr es-Seyyid Hüseyin’in sefine-i mezkûrede hamûlesinden kat‘â nesnesini deryâya ilkā etmemekle öyle olacak mârrü’l-beyân pekmez ve cevizin kıymetleri olan bin altı yüz guruşu bana mâlından vermek üzere merkūm es-Seyyid Hüseyin’e cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mersûma tefhîm ve da‘vâ-yı mezkûresiyle mezbûr es-Seyyid Hüseyin’e bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî [kavaslarından] Yakub Kavas kulları yediyle huzûr-ı [âlîlerine i‘lâm olundu] Fî 13 Muharrem sene [12]55 [1256]