.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 121
Hüküm no: 105
Orijinal metin no: [22a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Havsa kazasındaki Adil Bey Vakfı mütevellisi ve kaymakamı Hasan b. Seyyid Abdullah’ın vefatıyla yerine Seyyid Osman b. Ali’nin tayini

Ma‘rûz,

Sâdır olan fermân-ı âlîlerine imtisâlen işbu arz ve derkenâra nazar olundukda Havsa kazâsında merhûm Adil Bey’in evlâ[d] be-evlâdına vakf ve şart eylediği vakf-ı mezkûrun tevliyet ve kurâ ve mezâri‘inin idâre-i rü’yet husûsuna bâ-berât-ı âlî kāimmakām olan es-Seyyid el-Hâc [Hasan] b. es-Seyyid Abdullah bilâ-veled fevt olup yeri hâlî ve hizmet-i lâzımesi mu‘attal kalmağla kāimmakāmlık-ı mezkûre yine evlâd-ı vâkıfdan es-Seyyid Ali b. Osman b. Süleyman dâ‘îlerine tevcîh buyurulmak ricâsına Kareferye nâibi es-Seyyid Veliyüddin Efendi dâ‘îlerinin mühr-i mutâbıkı arzla inhâ eder, lâkin asıl tevliyet-i mezkûre es-Seyyid Abdullah b. Hasan an-evlâdı vakf üzerinde olup ancak mezbûr es-Seyyid Abdullah’ın vakf-ı mezkûru rü’yet-i idâreye adem-i iktidâ[rı] hasebiyle iki yüz otuz bir târihinden berü vakf-ı mezkûra bâ-fermân-ı âlî kāimmakām nasb olunup yedine berat-ı şerîf-i âlîşân verildiği derkenâr-ı askerîden müsbet olmağın bu sûretde kāimmakāmlık-ı mezkûre müteveffâ-yı mezkûr es-Seyyid el-Hâc Hasan b. Abdullah’ın mahlûlünden arz-ı mezkûre nâtık olduğu üzere evlâd-ı vâkıfdan mûmâ-ileyh es-Seyyid Osman b. Ali dâ‘îlerine tevcîh ve yedine berat-ı şerîf ihsân buyurulmak muktezâ-yı derhâl idiği huzûr.

Fî 4 N sene [12]49