Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 294 Hüküm no: 422 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un vefat eden Abdullah Ağa terekesinden olan hissesini Abdullah Ağa’nın hanımı Emine Hatun’dan sulh yoluyla alıp zimmet ibrası yaptığı Ma‘rûz İstanbul’da Sultan Selim Han Câmi‘-i şerîfi kurbünde Mimâr Şücaeddin mahallesinde sâkin iken bundan akdem vefât eden Abdullah Ağa b. Ali b. Hüseyin’in verâseti zevce-i menkûha-i metrûkesi Emine Hatun bt. Mustafa ile li-ümmin kız karındaşı Fâtıma bt. İbrahim’e münhasıra olduğu lede’ş-şer‘i’l-enver zâhir ve mütehakkık oldukdan sonra sâhibe-i arzuhâl mu‘arrefetü’z-zât uht-i mezbûre Fâtıma Hatun İstanbul Bâb Mahkemesi’nde meclis-i şer‘de derûn-ı arzuhâlde mezkûretü’l-ism kezâlik zâtı mu‘arrefe zevce-i merkūm Emine Hatun muvâcehesinde merkūme Emine Hatun mûrisimiz kız karındaşım müteveffâ-yı mezbûrun terekesinden olarak ma‘lûmü’l-ecnâs ve’l-mikdâr kereste ve bir çift piştov ve bir şeşhâne tüfenk ve bir kırmızı Arab şalı ve bir Urus şalı ve üç tulum ve iki nühâs fener ve bir kahve değirmeni ve bir terâzî ma‘a derâhim ve üç bez don ve bir saltamarkasını fuzûlî ahz u ketm ve ihfâ ederek bin beş yüz kırk guruşa âhara bey‘ ile istihlâk etmekle meblağ-ı mezkûrdan benim hisse-i irsiyeme isâbet eden bin yüz elli beş guruşu merkūme Emine Hatun’dan bi’l-verâse damânen taleb ederim deyü tasaddî eylediğim da‘vâmdan bâ-tavassut-ı muslihîn merkūme Emine Hatun ile kat‘an li’n-nizâ‘ bi’t-tav‘ ve’r-rızâ yüz guruş bedel-i medfû‘ ve makbûza sulh olduğumda ol dahi sulh-ı mezkûru ba‘de’l-kabûl mâ‘adâ müdde‘âma ve bi’l-cümle husûs-ı mezkûra ve müteveffâ-yı mezbûrun kalîl ü kesîr nükūd ve arûz ma‘lûm ve meçhûl ism-i mâl ıtlâk olunur terekesine ve hukūk-ı mîrâsa müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 21 Muharrem sene [1]256