Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 313 Hüküm no: 457 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Halil Efendi’nin Kasap Mehmed Emin’e olan borcunu taksitler halinde ödemesi 278 guruş müeccelen edâya tenbîh Ma‘rûz Kasab es-Seyyid el-Hâc Mehmed Emin b. İbrahim nâm kimesne İstanbul Bâb Mahkemesi’nde meclis-i şer‘-i münîrde Sarrâc Halil Efendi b. Ali nâm kimesne muvâcehesinde mezbûr Halil Efendi zimmetinde bundan akdem mâlımdan ve yedimden iştirâ ve kabz eylediği ma‘lûmü’l-vezn ve’l-fiyat lahm-ı ganem semeninden ba‘de külli’l-hesâb gayr-ı ez-teslîmât sahhu’l-bâkī bâ-temessük iki yüz yetmiş sekiz guruş alacak hakkım olmağla meblağ-ı mezkûru merkūm Halil Efendi’den hâlâ taleb ederim deyü da‘vâ ettikde ol dahi cevâbında ikrâr lâkin deynim olan meblağ-ı mezkûr iki yüz yetmiş sekiz guruşu mezbûr es-Seyyid el-Hâc [Mehmed] Emin işbu sene-i mübâreke Muharremi’l-harâmı gurresinde beher şehr onar guruş verip mecmû‘unu târîh-i mezkûrdan yirmi yedi ay yirmi dört gün tamâmına değin tamâmen kendiye edâ etmek üzere rızâsıyla kabûlüme mukārin ben te’cîl etmişidim deyü müdde‘î-i mezbûrun inkârına mukārin eylediği def‘ini her biri mahallerinde lede’t-tezkiye adl ve makbûlü’ş-şehâde idikleri ihbâr olunan Sarrâc es-Seyyid Hüseyin Ağa b. es-Seyyid el-Hâc İbrahim ve es-Seyyid Derviş Mehmed b. Mustafa nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince mezbûr el-Hâc Mehmed Emin meblağ-ı mezkûr iki yüz yetmiş sekiz guruşu hâlen mutâlebeye kādir olmayıp meblağ-ı mezkûr ber-minvâl-i muharrer mezbûr Halil Efendi’den müeccelen tahsîl ve merkūm el-Hâc Mehmed Emin’e teslîm olunmak iktizâ eylediği mübâşirleri Bâb-ı Seraskerî kavaslarından Sivaslı Halil Kavas kulları yediyle huzûr-ı [âlîlerine i‘lâm olundu] Fî-gurre-i S sene [12]56