Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 313 Hüküm no: 458 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ogaseb zimmînin oda kirasından alacağı olduğu iddiasıyla Hasan Ağa’ya açtığı davanın reddedildiği 1950 guruş bî-vech-i şer‘î mu‘ârazadan men‘ [Ma‘rûz] İstanbul’da Ketenciler kurbünde Hasırcılar sûkunda vâki‘ Yenihan’ın mukaddemâ oda bekçisi arzuhâl eden Ogaseb v. Oharum? nâm zimmî İstanbul Bâb Mahkemesi’nde meclis-i şer‘de derûn-ı arzuhâlde mezkûrü’l-ism es-Seyyid Hasan Ağa b. es-Seyyid İshak nâm kimesne muvâcehesinde işbu târîhden dört sene mukaddem ben hân-ı mezkûrda oda bekçisi olduğum hînde hân-ı mezkûr odalarından bir bâb odayı şehriye ellişer guruş kirâ tesmiyesiyle bundan akdemce hâlik olan Ohannes zimmîye sağlığında îcâr ve teslîm ol dahi akdi nefsine izâfe ederek ba‘de’l-istîcâr ve’l-kabûl mâlı olan ma‘lûmü’l-mikdâr boyalarını oda-i mezkûra vaz‘ eyledikden sonra mersûm Ohannes zimmî oda-i mezkûru mukaffelen terk ve ta‘dîl birle diyâr-ı âhara gidip ba‘dehu merkūm es-Seyyid Hasan Ağa zikr olunan boyaları gāib-i mersûm Ohannes zimmî ile benim müşterek mâlımdır deyü oda-i mezkûrun kuflünü feth ü küşâd ve derûnunda mevcûde mârrü’l-beyân boyaları ahzeylediğinden sonra oda-i mezkûr kirâsından gāib-i mersûm zimmî zimmetinde kırk dört ayda müctemi‘ olan iki bin iki yüz <> guruşun iki yüz elli guruşunu gāib-i mersûm yedinden mukaddemâ kabz etmemle bâkīsi olan bin dokuz yüz elli guruşu mezbûr es-Seyyid Hasan Ağa’dan mücerred ben gāib-i mersûmun şerîkiyim dediğine binâen taleb ederim deyü merkūmun işbu yedinde olup bin iki yüz elli beş senesi Zilhiccetü’ş-şerîfesi’nin yirmi dokuzuncu günü Ahiçelebi Mahkemesi’nden verilen bir kıt‘a i‘lâm-ı şer‘î mantûkunca da‘vâ edip lâkin takrîr-i meşrûhum üzere tasaddî eylediğim da‘vâm müvecceh ve mültefit olmadığı kıbel-i şer‘den bana tefhîm olunmuşidi el-hâletü hâzihî oda-i mezkûrda mevcûde boyaları merkūm es-Seyyid Hasan Ağa’nın mâlı olduğu şer‘an sâbit olarak ahzetmekle öyle olacak icâre-i mezkûrdan bâkī bin dokuz yüz elli guruşu bana teslîme mezbûr es-Seyyid Hasan Ağa’ya tenbîh olunmak murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mersûm Ogaseb? zimmîye tefhîm ve da‘vâ-yı mezkûresiyle merkūm es-Seyyid Hasan Ağa’ya ke’l-evvel bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 8 S sene [12]56