Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 340 Hüküm no: 503 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Minad’ın alacak iddiasıyla Yorgi’ye açtığı davanın reddedildiği Men‘ Ma‘rûz Tütüncü tâifesinden Mina[d] v. Kaplan nâm zimmî İstanbul Bâb Mahkemesi’nde meclis-i şer‘-i hatîrde tâife-i mersûmeden Yorgi v. Kostandi nâm zimmî muvâcehesinde ben târîh-i i‘lâmdan yirmi iki gün mukaddem mesfûr Yorgi zimmî benim emînim olmak takarrübüyle medyûnum gāib ani’l-meclis Tütüncü Ahmed Ağa’ya götür ver deyü mâlımdan üç yüz guruş mersûm Yorgi zimmîye teslîm eylediğimde ol dahi ahz u kabz ve meblağ-ı mezkûru gāib-i mezbûra vermeyip yedinde kalmağla meblağ-ı mezkûru mersûm Yorgi zimmîden istirdâd ederim deyü da‘vâ ettikde ol dahi cevâbında müdde‘î-i merkūmdan ol mikdâr guruş ahz u kabz ve meblağ-ı mezkûru yine müdde‘î-i mersûma redd ü teslîm etmemle ol vechile meblağ-ı mezkûrdan zimmetimde bir nesne kalmamışdır deyü müdde‘î-i mersûm Minad zimmînin inkârına mukārin eylediği def‘inde mersûm Yorgi zimmî şer‘an yemînle tasdîk olunduğu mersûm Minad zimmîye tefhîm olundukda ol dahi tahlîfe tâlib olmamağın mûcebince müdde‘î-i mersûm Mina[d] zimmî da‘vâ-yı mezkûresiyle mersûm Yorgi zimmîye mu‘ârazadan men‘ olunduğu mübâşirleri Bâb-ı Seraskerî kavaslarından Karamürselli Mehmed Kavas kulları yediyle huzûr-ı [âlîlerine i‘lâm olundu] [Fî] 17 S sene [12]56