|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 128 Hüküm no: 116 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Geldiklan nâhiyesi Korkuk köyü vakıf mâlikânesi ile Han Zaviyesi zâviyedarlığı hisseleri sahiplerine berat verilmesi
Sâdır olan fermân-ı âlîlerine imtisâlen işbu arzuhâl ve derkenâr ve Defterhâne-i âmire’ye ba‘de’n-nazar medîne-i Amasya’ya tâbi‘ Geldiklan nâhiyesinde Korkuk nâm-ı diğer Honi nâm karyenin vakıf mâlikânesinin dört sehmden üç sehmi Güç Arslan evlâd-ı zükûruna meşrûta ve bir sehmi dahi kazâ-i mezbûra tâbi‘ Han Zâviyesi’nin zâviyedârlığına meşrûta olup ber-mûceb-i şart-ı vâkıf bir sehmine Han Zâviyesi’nin zâviyedârlığı sahib-i arzuhâl Seyyid Mustafa ve Seyyid Ahmed ibney Seyyid Mehmed ile Güç Arslan evlâdlarından Seyyid Mehmed Ârif ve Seyyid İbrahim ibney Mehmed İzzet nâm karındaşlarından ve sâlifü’z-zikr üç sehmi müstefâd-ı mezbûrân Seyyid Mehmed Ârif ve Seyyid İbrahim üzerlerinde olduğu askerî rûznâmçesi derkenârından müstebân mârrü’z-zikr karye-i mezbûrun mâlikânesi dört sehmden zâviye-i Han nâm Güç Arslan amel-i kadîmi iki sehm <> sahib-i arzuhâl Seyyid Mustafa ve Seyyid Ahmed nâm karındaşlar eben an-ceddin mutasarrıflar olup kendi hisselerine tasrîhan müceddeden berat-ı şerîf-i âlîşân i‘tâ buyurulmak niyâzında istirhâm eyledikleri meâl-i arzuhâlde bedîdâr ise de karye-i mezbûr mâlikânesinin dört sehmden üç sehm müstakillen müşterekleri mezbûrân Seyyid Mehmed Ârif ve Seyyid İbrahim ve bir sehm ile Han Zâviyesi’nin altı sehm i‘tibârıyla iki sehm zâviyedârlığı merkūmân Seyyid Mustafa ve Seyyid Ahmed ibney Seyyid Mehmed’in dört sehmi mezbûrân Mehmed Ârif ve Seyyid İbrahim ibney Mehmed İzzet nâm karındaşların ber-mûceb-i kuyûdât üzerlerinde olup Güç Arslan evlâdına meşrûta üç sehmden sarf-ı nazar olunup bir sehm ile Han Zâviyesi zâviyedârlığı iki sehm i‘tibârıyla da zâviyedârlığı ashâb-ı arzuhâl Seyyid Mustafa ve Seyyid Ahmed ibney Mehmed’in istihkâmen ibkā ve zımnında yedlerine berat-ı âlîşân sadaka ve ihsân buyurulmak emr-i savâb idiği huzûr-ı âlîlerine i‘lâm olundu.
Fî 3 Zilhicce sene [12]49
|