.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 127
Hüküm no: 115
Orijinal metin no: [23b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Konya Geriz Mezraası Vakfı mezraadarlık vazifesinin evlad-ı vakıfdan olan şahıslara eşit olarak dağıtılması

Sâdır olan fermân-ı âlîlerine imtisâlen medîne-i Konya nâibi es-Seyyid el-Hâc Necib Efendi dâ‘îlerinin mühr-i mutâbık arzıyla derkenârlara nazar olundukda medîne-i mezbûrede vâki‘ Geriz Mezrâ‘ası Vakfı’nın vazîfe-i mu‘ayyene ile ber-vech-i meşrûta mezrâ‘adârı olan evlâd be-evlâd vakfının batn-ı sânîde olup derecede müsâvî ber-vech-i iştirâk bâ-berât-ı âlî mutasarrıfları Abdüsselam b. Süleyman ve Abdi b. İbrahim ve Abdülgaffar b. Mehmed ve Mehmed b. Hâşim Hasan bilâ-veled ve Abdurrahman b. İsmail ve diğer Mehmed b. Mustafa nâm kimesneler müte‘âkıben fevt olup mahlûllerine evlâd-ı vâkıfdan Hüseyin ve İsmail ibney Abdi ve Ahmed Bey b. Abdülgaffar, Kezban ve Fâtıma bt. Abdurrahman ve Âişe bt. Mehmed ve Âişe bt. Abdüsselam ve Anakız ve Âişe ve Şerife ve benât-ı Abdülgaffar nâm evlâdları evlâdiyet ve meşrûtiyet üzere zükûr ve inâs siyyân olarak vazîfe-i mersûmesiyle ale’l-iştirâki’l-kabûl tevcîh olunmasını niyâzından mâ‘adâ evlâd-ı merkūmûndan olan Ahmed Bey vakf-ı mezkûra kāimmakām nasb u ta‘yîn kılınması nâib-i mûmâ-ileyhin arz-ı mezkûrundan müstefâd olup merkūmûn Abdüsselam ve Abdi ve Abdülgaffar ve Mehmed ve Abdurrahman ve diğer Mehmed nâm kimesnelerin bi-emrillâhi te‘âlâ müte‘â[kı]ben fevt oldukları vâki‘ ve Hüseyin ve İsmail nâm karındaşlar müteveffâ-yı merkūm Abdi’nin sulbî oğulları Ahmed Bey ve Anakız Âişe ve Şerife müteveffâ-yı merkūm Abdülgaffar’ın sulbî oğulları ve sulbiye kızları Kezban ve Fâtıma da müteveffâ-yı mezbûr Abdurrahman’ın sulbiye kızları ve diğer Âişe müteveffâ-yı mezbûr Mehmed’in sulbiye kızı Atike müteveffâ-yı merkūm Abdüsselam’ın ber-vech-i muharrer merkūmûn müteveffiyûn-ı mezbûrûn sulbî oğulları ve sulbiye kızları olduklarını kazâ-i mezbûr ahâlîsinden Der-aliyye’de müsâfiren sâkinler ehl-i vukūfdan selâtîn-i izâm şeyh-i dersi‘âm Konyevî es-Seyyid Halil Efendi ve Şeyh Sadreddin imâmı es-Seyyid Abdullah Efendi ber-vech-i muharrer müteveffiyûn-ı merkūmûnun mahlûllerinden evlâd-ı vâkıfdan derecede müsâvî evlâd-ı merkūmûn Hüseyin ve İsmail ibney Abdi’nin ve Ahmed’in ve Anakız ve Âişe ve Şerife ve ibnûn-ı Abdülgaffar ve Kezban ve Fâtıma bt. Abdurrahman ve diğer Âişe bt. diğer Mehmed ve Atike bt. Abdüsselam nâm evlâdlarına evlâdiyet ve meşrûtiyet üzere zükûr ve inâs siyyân olarak ber-mûceb-i şart-ı vâkıf vazîfe-i mersûmesiyle ale’l-iştirâki’s-seviy tevcîh ve yedlerine bir kıt‘a berat-ı şerîf-i âlîşân sadaka ve ihsân buyurulmak iktizâsından idiği huzûr-ı âlîlerine i‘lâm olundu.

Fî-gurreti Ra sene [12]49