Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 356 Hüküm no: 533 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaymakçı Donço’nun vefat eden Yani’ye ait sütçü gediği hissesinin kira bedelinin kendisine verilmesi talebiyle açtığı davanın reddedildiği Gedik da‘vâsından men‘ Ma‘rûz Arzuhâl eden Kaymakçı Donço v. Fedon nâm zimmî İstanbul Bâb Mahkemesi’nde meclis-i şer‘-i münîrde derûn-ı arzuhâlde mastûrü’l-ism Yani v. Çelo nâm zimmî muvâcehesinde mahrûse-i Galata’ya muzâfe kasaba-i Tophâne’de Zincirlikuyu nâm mahâlde vâki‘ bir bâb sütçü kârhânesi derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin yüz yirmi sehm i‘tibârıyla kırk sehmi benim ve kırk sehmi mersûm Yani zimmînin ve kırk sehmi Veliko zimmînin iştirâken ve şâyi‘an taht-ı tasarruflarımızda olup ancak âlât-ı gedik-i mezkûr bundan akdem muhâyâten zabt ü tasarruf olunmağla bin iki yüz elli dört senesi nevbet-i muhâyâsı mersûm Veliko zimmînin olduğundan ben dahi mersûm Veliko zimmînin âlât-ı gedik-i mezkûru âhara îcâra vekîli olmamla ol vechile âlât-ı gedik-i mezkûru bir seneliğini mesfûr Yani zimmîye üç bin guruş icâre tesmiyesiyle îcâr ve teslîm eylediğimde ol dahi istîcâr ve kabûl etmişidi el-hâletü hâzihî mersûm Veliko zimmî bundan akdem hâlik olup kırk sehm hisse-i mezkûre üç nefer evlâdına âdiyen intikāl edip lâkin ben mücerred mukaddemâ âlât-ı gedik-i mezkûru mersûm Yani zimmîye îcâr etmemle öyle olacak icâre olan üç bin guruşu dahi bana vermek üzere mesfûr Yani zimmîye cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı mersûm Donço zimmîye tefhîm ve da‘vâ-yı mezkûresiyle mesfûr Yani zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 12 S sene [12]56