Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 355 Hüküm no: 532 Orijinal metin no: [71b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Reis’in hizmet bedeli olmak üzere Mehmed’e açtığı alacak davasında sulh oldukları 384 guruş sulh Ma‘rûz Rüesâ-yı sefâyinden sâhib-i arzuhâl Hüseyin Reis b. Hasan nâm kimesne İstanbul Bâb Mahkemesi’nde meclis-i şer‘de derûn-ı arzuhâlde mezkûrü’l-ism Mehmed b. Ali nâm kimesne muvâcehesinde ben bundan akdem merkūmun talebiyle mâlik olduğu sefinesinde ücret kavlinsiz on bir ay reislik edip ba‘dehu müfârakat etmemle müddet-i mezkûrede müstahık olduğum ecr-i mislimi mezbûr Mehmed’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm ile bi’t-tav‘ ve’r-rızâ üç yüz seksen dört guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde ecr-i misl mutâlebesine ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz seksen dört guruşu müdde‘î-i merkūm Hüseyin’e edâya tenbîh olunduğu huzûr-ı [âlîlerine i‘lâm olundu] Fî 20 S sene [12]56