Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 370 Hüküm no: 559 Orijinal metin no: [74b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Onbaşı İsmail Ağa’nın Francalacı İbrahim’e açtığı alacak davasının reddedildiği Bî-vech-i şer‘î mu‘ârazadan men‘ Ma‘rûz Anadolu’da Karahisar-ı Şarkī kazâsı kurâlarından Enderes karyesi ahâlîsinden ve Asâkir-i Mansûre onbaşılarından Kara Musa oğlu es-Seyyid İsmail Ağa b. Hasan nâm kimesne İstanbul Bâb Mahkemesi’nde meclis-i şer‘-i münîrde karye-i mezbûre ahâlîsinden Francalacı es-Seyyid İbrahim b. Abdullah nâm kimesne muvâcehesinde târîh-i i‘lâmdan dört sene mukaddem li-ebeveyn er karındaşım olan es-Seyyid Ali nâm kimesne gāib ani’l-meclis Nikola v. Atam zimmîye zimmetinde cihet-i karzdan deyni olan yetmiş iki guruş ile gāib-i mersûm benim üzerime kabûlüme mevkūfe bâ-poliçe havâle edip gāib-i mersûm Nikola zimmî dahi havâle-i mezkûreyi bana ifâde ve temessüğü irâe eylediğinde ben dahi havâle-i mezkûreyi kabûl ve meblağ-ı muhâlün-bih-i mezkûru gāib-i mersûm Nikola zimmîye vermek için merkūm es-Seyyid İbrahim’e teslîm eylediğimde ol dahi ahz u kabz ve meblağ-ı mezkûr altmış iki guruşu gāib-i mersûm Nikola zimmîye teslîm etmişidi el-hâletü hâzihî karındaşım mezbûr es-Seyyid Ali’nin gāib-i mesfûr Nikola zimmîye deyni olmadığı mesmû‘um olmağla öyle olacak meblağ-ı mezkûr yetmiş iki guruşu bana mâlından tazmîn etmek üzere merkūm es-Seyyid İbrahim’e cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūma tefhîm ve da‘vâ-yı mezkûresiyle merkūm İbrahim’e bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî kavaslarından Bitlisli Said Kavas kulları yediyle huzûr-ı [âlîlerine i‘lâm olundu] Fî 8 S sene [12]56