Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 389 Hüküm no: 589 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin, Rukiye Hanım’ın İbrahim Efendi’de olan alacağını almaya ve Emetullah Hanım ile olan tevliyet davasında kendisini vekil tayin ettiğini ispat ettiği Vilâyet-i Rumeli’de medîne-i Filibe mahâllâtından Câmi‘-i Kebîr mahallesinde sâkine Rukiye Hanım bt. Mehmed Bey b. Hasan Bey tarafından ber-vech-i âtî bâ-hücet-i şer‘iyye vekâlet iddi‘â eden işbu bâ‘isü’l-vesîka es-Seyyid Mehmed Efendi b. es-Seyyid İbrahim meclis-i şer‘-i şerîf-i enverde es-Seyyid İbrahim Efendi b. es-Seyyid el-Hâc Hüseyin mahzarında üzerine da‘vâ ve takrîr-i kelâm edip mezbûre Rukiye Hanım’ın merkūm es-Seyyid İbrahim Efendi zimmetinde cihet-i deyn-i şer‘îden alacak hakkı olan on guruşu mezbûr es-Seyyid İbrahim Efendi’den taleb ve da‘vâ ve ahz u kabza ve makbûzunu kendiye irsâl ve îsâle ve gāibetü ani’l-meclis Emetullah Hanım bt. Mehmed Bey ile tevliyet husûsuna dâir mürâfa‘aları olmağla mezbûre Emetullah Hanım ile ber-nehc-i şer‘î muhâsamaya tarafından beni yedimde olup sene-i sâbıkā yani bin iki yüz elli beş senesi Zilka‘detü’ş-şerîfesi’nin on yedinci günü târîhiyle müverrah medîne-i mezbûre kādısı mevâlî-i devriyyeden fazîletlü Mehmed Sadık Efendi’nin imzâsıyla mümzât ve hatmiyle mahtûme mührünü mutâbık bir kıt‘a hüccet nâtıka olduğu üzere vekâlet-i mutlaka-i sahîha-i şer‘iyye ile kabûlüme mevkūfe vekîl nasb ü ta‘yîn etmekle cihet-i vekâlet bana vâsıl oldukda ben dahi vekâlet-i mezkûreyi kabûl etmemle meblağ-ı mezkûr on guruşu merkūm es-Seyyid İbrahim Efendi’den bi’l-vekâle taleb ederim deyü da‘vâ ettikde ol dahi cevâbında müvekkile-i merkūme Rukiye Hanım zimmetinde cihet-i deyn-i şer‘îden on guruş deyni olduğunu ikrâr müdde‘î-i mezbûrun ber-vech-i meşrûh vekâleti ma‘lûmum değildir deyü inkâr etmekle müdde‘î-i merkūmdan ber-vech-i muharrer müdde‘âsına mutâbık beyyine taleb olundukda ocak tatarlarından olup medîne-i mezbûreden bu esnâda Der-aliyye’ye vürûd eden İsmail Ağa b. Mehmed ve Rüstem Ağa b. Numan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Rukiye Hanım bt. Mehmed Bey b. Hasan Bey merkūm es-Seyyid İbrahim Efendi zimmetinde alacağı olan meblağ-ı mezkûr on guruşu merkūm es-Seyyid İbrahim Efendi’den taleb ve da‘vâ ahz u kabza ve makbûzunu kendiye irsâl ve îsâle ve gāibetü ani’l-meclis Emetullah Hanım bt. Mehmed Bey ile tevliyet husûsuna dâir mürâfa‘aları olmağla gāibe-i merkūme Emetullah Hanım ile ber-nehc-i şer‘-i şerîf muhâsamaya ve husûs-ı mezkûr[un] mütevakkıf olduğu umûrun küllîsine tarafından merkūm es-Seyyid Mehmed Efendi’yi târîh-i mezkûrda bizim huzûrumuzda kabûlüne mevkūfe vekâlet-i âmme-i mutlaka-i sahîha-i şer‘iyye ile vekîl nasb u ta‘yîn eyledi biz bu husûsa bu vech üzere şâhidleriz şehâdet dahi ederiz deyü her biri müttefiku’l-lafz ve’l-ma‘nâ edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle müdde‘î-i merkūm es-Seyyid Mehmed Efendi’nin vekâletine ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-şehri Rebî‘ilâhir li-sene sitte ve hamsîn ve mi’eteyn ve elf. Şuhûdü’l-hâl: Ahmed Ağa b. Halil, Mehmed Ağa b. İbrahim