Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 388 Hüküm no: 588 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa ile hanımı Ayşe’nin varislerinin miras hisselerini alıp zimmet ibrası yaptıkları Mahrûse-i Galata’ya muzâfe kasaba-i Tophâne’de el-Hâc Memi mahallesinde sâkin iken bin iki yüz kırk bir senesi hilâlinde vefât eden Mustafa b. Ahmed b. Abdullah’ın verâseti zevce-i menkûha-i metrûkesi Âişe bt. İbrahim nâm hatun ile sulbî kebîr oğulları seccâde tüccârından es-Seyyid Mehmed Ağa ve es-Seyyid Ali Efendi ve sulbiye kebîre kızı Şerife Ümmühânî Hatun’a münhasıra ba‘dehu zevce-i mezbûre Âişe Hatun dahi vefât edip verâseti sadri evlâdı mezbûrûn es-Seyyid Mehmed Ağa ve es-Seyyid Ali Efendi ve Şerife Ümmühânî Hatun’a münhasıra ve tashîh meselesi bi-tarîkı’l-münâsaha ve’l-ihtisâr beş sehmden olup sihâm-ı mezbûreden ikişer sehmden dört sehmi mezbûrân es-Seyyid Mehmed Ağa ve es-Seyyid Ali Efendi’ye ve bir sehmi mezbûre Şerife Ümmühânî Hatun’a isâbeti tahakkukundan sonra verese-i mezbûrûndan olup kendi nefsinden asıl ve hemşîresi mezbûre Ümmühânî Hatun tarafından husûs-ı âti’l-beyânda vekîl olduğu zât-ı mezbûreyi bi’l-mu‘arrefetü’ş-şer‘iyye ârifân Mehmed Ârif Ağa b. Mehmed ve el-Hâc Mustafa Ağa b. el-Hâc İbrahim nâm kimesneler şehâdetleriyle ber-nehc-i şer‘î sâbit olan merkūm es-Seyyid Ali Efendi meclis-i şer‘-i şerîf-i enverde merkūm es-Seyyid Mehmed Ağa tarafından husûs-ı âti’l-beyânda tasdîka vekîl olduğu Veliyyüddin Ağa b. İdris ve Molla Mustafa b. Ali şehâdetleriyle sâbit olan el-Hâc Hafız Ömer Efendi b. Abdullah mahzarında bi’l-verâse ve bi’l-vekâle ikrâr-ı tâm ve takrîr-i kelâm edip mûrisimiz müteveffâ-yı evvel-i merkūm Mustafa ile vâlidemiz müteveffât-ı sâniye-i mezbûrenin bi’l-cümle terekelerini bi’t-terâzî beynimizde iktisâm edip ber-mûceb-i münâsahat-i mezkûre her birimiz hisse-i irsiyelerimizi ba‘de’l-kabz ancak mûrisimiz müteveffâ-yı evvel-i mezbûrun terekesinden bâkī kalıp Vilâyet-i Anadolu’da Kütahya sancağına tâbi‘ Kula kasabasında kâin ma‘lûmü’l-hudûd bir bâb menzil arsası ile ma‘lûmü’l-hudûd kürûmu mülk bir kıt‘a bağdan mâ‘adâ ebeveynimiz müteveffiyât-ı evvel ve sâniye-i mezbûrânın kalîl ü kesîr celîl ü hakīr nükūd ve urûz bi’l-cümle ism-i mâl ıtlâkolunur terekelerine ve hukūk-ı mîrâsa müte‘allika âmme-i de‘âvîden tarafeynden her birimiz âharın zimmetini bi’l-verâse ve bi’l-vekâle ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü mukırr-ı asıl ve vekîl-i mezbûr es-Seyyid Ali Efendi’nin bi’l-cümle takrîr-i meşrûhunu vekîl-i merkūm el-Hâc Hafız Ali Efendi vicâhen tahkīk ve şifâhen tasdîk etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘ilevvel li-sene sitte ve hamsîn ve mi’eteyn ve elf. Şuhûdü’l-hâl: Muhzır Halil Ağa b. Süleyman, Muhzır Nazif Ağa b. Osman, Muhzır İsmail Ağa b. Mehmed