Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 62 Hüküm no: 11 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahaeddin Bey b. Ulama Paşa’nın Priştine’deki çiftliği ve değirmenlerinin Beşaret Bey’e satışı [Yev]mü’l-isneyn fî 19 Cemâziyelâhire sene 964 Kıdvetü’l-emâcid ve’l-ekârim Bahaeddin Bey b. el-merhûm Ulama Paşa meclis-i şer‘de Beşaret Bey b. Hasan nâm za‘îm mahzarında Priştine kazâsına tâbi‘ Yezara? nâm karyede vâki‘ olup dört evi ve matbahı ve fırını ve üç ahırı ve pınarı ve hamamı ve üç muhavvatayı müştemil olan Ulamapaşa Çiftliği demekle ma‘rûf ma‘lûmü’l-hudûd mülk çiftliğimi ve mezbûr çiftliğe tâbi‘ tevâbi‘i ve Zudimle? deresi demekle ma‘rûf nehir üzerinde dâyir karye-i mezbûre ile Sitrine? nâm karye sınırında vâki‘ olan bir birinden müteferrik sekiz göz ma‘lûmü’l-hudûd mülk değirmenimi ve sekiz re’s karasığır öküzünü cemî‘ hudûdu ve hukuku ve tevâbi‘i ve levâhıkı ve tarâikı ve murâfıkı ile ve sekiz re’s karasığır öküzümü safka-i vâhide ile mezbûr Beşaret Bey’e otuz bin râyicü’l-vakt akçeye bey‘ edip teslîm-i mebî‘ ve kabz-ı semen etdim ve mezbûr çiftliğe tâbi‘ olup hudûdu inde’l-ahâlî ma‘lûm ve meşhûr olan çayırlar ve tarlalarımı ve baştine ve balıklağı ve sazlık ve İrjana yaylağı demekle meşhûr olan ma‘lûmetü’l-hudûd yaylakda olan hakk-ı karârımdan ferâgat edip cümlesin tasarruflarını müşârun-ileyh Beşaret Bey’e tefvîz ettim deyu ikrâr ve i‘tirâf ettikde [2a] mezbûr Beşaret Bey zikr olan çiftliği ve değirmenleri ve sığırları cemî‘ tevâbi‘i ve levâhıkı ile ve sığırları otuz bin râyicü’l-vakt akçeye mezbûr Bahaeddin Bey’den iştirâ edip teslîm-i semen ve kabz-ı mebî‘ ettim deyu mukırr-ı mezbûrun vech-i meşrûh üzere ikrârın tasdîk edip mâ-vaka‘a gıbbe’t-taleb ketb olunup yed-i tâlibine def‘ olundu. Şuhûdü’l-hâl: Mevlânâ Yar Mehmed b. Muslihiddin el-hatîb, Mehmed b. Süleyman eş-şehîr bi-İsa Halîfe, Üstâd Durak b. Mustafa, Cihan Bey b. Hasan, İbrahim Çelebi b. Kasım, Hacı Çavuş b. Hayreddin, Hasan b. Seydî, Mustafa b. Ali.