Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 64 Hüküm no: 17 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülfem Hatun bt. Abdürrahim’in Kızılaağaç’taki çiftliğini Mustafa Bey b. Hızır’a satışı Vech-i tâhrîr-i hurûf oldur ki, Mustafa Çelebi b. Ali Bey cânibinden emlâkini bey‘a ve sâir umûruna ve bi’l-cümle “i‘mel bi ra’yike ve’f‘al mâ şi’te” ma‘nâsına fahrü’l-emâsil ve’l-akrân Elmas Ağa b. Abdülkerim ve Yakub Ağa b. Abdürrahim şehâdetleriyle vekâlet-i mutlakası sâbit olan kıdvetü’l-havâtîni’l-mu‘azzamât zübdetü’n-nisvâni’l-müfahhamât aliyyetü’z-zât refî‘atü’d-derecât el-muhtassatü bi-inâyeti’l-meliki’l-kerîm hazret-i Gülfem Hatun bt. Abdürrahim dâmet-ismetühâ ve zâdet iffetuhâ tarafından bey‘-i âtîye ve kabz-ı semene Mustafa Bey b. Ali ve Mehmed b. Hasan nâm bevvâblar şehâdetiyle vekâleti sâbit olan Mahmud Bey b. Abdullah nâm bevvâb-ı hâkânî meclis-i şer‘-i şerîfe hâzır olup işbu hâmilü’l-kitâb Mustafa Bey b. Hızır mahzarında takrîr-i kelâm ve sevk-i merâm kılıp mezbûr Mustafa Çelebi’nin emlâkinden ve Kızılağaç kazâsına tâbi‘ Tirli? nâm karyede vâki‘ olup beş çatma evi ve dört anbârı ve iki ahırı ve üç sığır damı ve bir samanlık ve bir güvercinliği ve iki muhavvatayı müştemil olup hudûdu mezbûr Mustafa Çelebi’ye intimâyla karye-i mezbûre ahâlîsi beyninde ma‘lûm ve meşhûr olan mülk çiftliğin cemî‘ tevâbi‘î ve levâhıkı ve tarâikı ve merâfıkı ile ve on yedi re’s bâyi‘ ile müşterî beyninde ma‘lûm ve mu‘ayyen susığırı ineği müşârun-ileyhâ Gülfem Hatun tarafından hükm-i vekâletim ile mezbûr Mustafa Bey b. Hızır’a on bin dört yüz râyicü’l-vakt akçeye bey‘ edip teslîm-i mebî‘ ve kabz-ı semen ettim deyu ikrâr ve i‘tirâf ettikde mezbûr Mustafa Bey dahî mukırr-ı mezbûrun vech-i meşrûh üzere ikrârını tasdîk ettikden sonra mezbûr Mahmud Bey takrîr-i kelâm edip zikr olunan çiftliğe tâbi‘ olup hudûdu karye-i mastûra ahâlîsi beyninde ma‘lûm ve meşhûr olan dört çiftlik mezra‘anın ve iki yüz araba mikdârı otluğu hâsıl olup çayırın hakk-ı tasarrufundan ferâgat edip hükm-i vekâletim ile müşterî-i mezbûra tefvîz ettim min ba‘d keyfe mâ yeşâ’ mutasarrıf ola deyu ikrâr ettikde müşterî-i mezbûr dahî tasdîk edip mâ-vaka‘a bi’t-taleb ketb olunup yed-i tâlibine def‘ olundu. Tahrîren fi’l-yevmi’t-tâsi‘ min-şehri Recebi’l-mürecceb sene 964. Şuhûdü’l-hâl: Ali Bey b. Abdullah kethüdâ-i Rumeli, Mustafa Bey b. Abdullah, kethüdâ-i mir-i mîrân-ı Rumeli, Mehmed Bey b. Abdullah kethüdâ-i mir-i mîrân-ı Rumeli, Sinan b. Abdullah ez-zevvâk, Hacı Hasan b. Abdullah el-kâtib, Ferhad Bey b. Abdullah el-kâtib, Derviş Bey b. Abdullah el-kā’id, Mahmud Bey el-kā’id, Hamza b. Abdullah el-bevvâb, Nasûh b. Mahmud.