Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 69 Hüküm no: 27 Orijinal metin no: [5b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vezir İbrahim Paşa’nın Hayrabolu’daki ahırlarını Vezir Ali Paşa’ya sattığı Vezîr-i mükerrem Hazret-i İbrahim Paşa -el-vezîr sâbıkan- kıbelinden âti’z-ikr bey‘i ikrâra vekâleti Mevlânâ Muhammed b. Ahmed ve Mevlânâ Mehmed b. Pîr Mehmed nâm kimselerin şehâdetleriyle sâbit olan Mevlânâ Harun b. Abdullah meclis-i şer‘-i şerîfe hâzır olup şöyle ikrâr eyledi ki, müvekkil-i mezbûru Hazret-i İbrahim Paşa, mâliki olduğu ve taht-ı tasarrufunda bulundurduğu, kazâ-yı Hayrabolu tevâbi‘inden Sinanlı karyesinde vâki‘, bâyi‘-i mezbûra âidiyetinden sahip olduğu şöhreti münâsebetiyle tahdîdden müstağnî bulunan ahırlarını cümle hudûdu ve hukuku, tevâbi‘ ve levâhıkıyla râyicü’l-vakt kırk bin akçe semen-i mu‘ayyen-i makbûz ile vezîr-i mükerrem ve müşîr-i müfahham Hazret-i Ali Paşa kıbelinden iştirâya, teslîm-i semen ve kabz-ı mebî‘a vekâleti Hasan Bey b. Abdullah ve Hamza Bey b. Şîrmerd nâm kimselerin şehâdetleriyle sâbit olan vekîl-i şer‘î fahrü’l-emâsil ve’l-akrân Hızır Bey b. İlyas’a bey‘ eyledi. O da vekâlet-i mahkiyesi hasebiyle iştirâ eyledi. Vâki‘ ikrâr mezbûr Hızır Bey tarafından bi’l-müvâcehe tasdîk edildi. Şuhûdü’l-hâl: ( )