Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 76 Hüküm no: 39 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedik Ali Bey b. Haydar Bey’in oğlu Mehmed ile Hatice bt. İbrahim Bey’in aralarındaki tereke davasında sulh oldukları Hatice bt. İbrahim Bey nâm hatun meclis-i şer‘-i şerîfe gelip Gedik Ali Bey b. Haydar Bey’in oğlu Mehmed mahzarında ikrâr ve takrîr-i kelâm edip bundan akdem mezkûr Ali Bey hâl-i hayâtında iken benim zevcim olup ikrâh ile mehrimden ve sâir da‘vâmdan ferâgat ettirip bana talâk vermeğin mezkûr Ali Bey fevt olucak ben dahî mezkûr Mehmed ile müteveffâ-i mezkûrun muhallefâtına müte‘allik münâza‘ât-ı kesîre ve muhâsamât-ı şedîde etmiş idim. Hâliyâ mezbûr Mehmed’in yedinden iki bin akçe alıp kabz edip zimmetini cemî‘ da‘vâdan ve muhâsamâtdan husûsen müteveffâ-i mezkûrun muhallefâtına müte‘allik da‘vâdan ibrâ-i âmla ibrâ ve ıskāt eyledim min ba‘d müteveffâ-yi mezbûrun metrûkâtında hakkım ve şüphe-i? hakkım yokdur dedikde mesfûr Mehmed dahî mezkûr[e] Hatice’nin zimmetini cemî‘ da‘vâdan ibrâ-i âmm ile ibrâ ve ıskāt eyledim deyu mu‘terif oldukda mukırrân-ı mezkûrânın herbiri âharı bi’l-müvâcehe tasdîk etdiklerinde mâ-vaka‘a bi’t-taleb kayd olundu. Şuhûdü’l-hâl: Lütfi b. Abdullah, İbrahim Bey b. Abdullah, Âlemşah Bey b. Ahmed, Mehmed b. İmirza, el-Hâc Ali b. Abdullah.