Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 91 Hüküm no: 72 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlânâ Lütfi Çelebi Evkafı’nın alacağının, mütevellîsi olan Mevlânâ Ali Çelebi b. Ahmed Çelebi tarafından Şemse Hatun’dan tahsil edildiği Vech-i tahrîr-i hurûf oldur ki, Merhûm ve mağfûrun-leh Mevlânâ Lütfi Çelebi Evkāfı’na hâliyâ mütevellî olan Mevlânâ Ali Çelebi b. Ahmed Çelebi meclis-i şer‘-i şerîfde merhûm-i mezbûrun kız karındaşı ve vârisi olan Şemse Hatun bt. Mehmed mahzarında ikrâr ve takrîr-i kelâm edip vâkıf-ı mezbûr hâl-i hayâtında iken vakf-ı mezbûr mâlından karz on beş bin akçe almış idi hâliyâ mezkûr Lütfi Çelebi fevt oldukda meblağ-ı mezbûru müteveffâ-i mezkûrun muhallefâtından mezbûre Şemse Hatun yedinden bi’t-tamâm ve’l-kemâl alıp kabz eyledim mâl-ı vakıfdan mezbûr müteveffânın muhallefâtında ve mesfûre Şemse Hatun zimmetinde nesne kalmadı dedikde mukırr-ı mezbûr[u] Şemse Hatun bi’l-müvâcehe tasdîk ettikde mâ-vaka‘a bi’t-taleb kayd olundu. Şuhûdü’l-hâl: Lütfi Beyzâde, Mahmud Çelebi, Timur b. Mahmud.