Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 92 Hüküm no: 73 Orijinal metin no: [13b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Hamza’nın, terekesi Beytülmâl tarafından zabt edilen el-Hâc Mehmed b. Menteş’in mirasçısı olduğu Mahmiye-i Kostantıniyye mahallâtından Oruc Gazi Mahallesinde sâkin olan Hürrem b. Abdullah nâm tâcir ve yine mahalle-i mezkûreden Budak b. Süleyman nâm kimseler emâcid-i ekârim defterdârlar nezdindeki dîvân-ı âlîye gelip fahrü’l-akrân Beytülmâl-i hâs emîni Hızır Çelebi b. İlyas ve kâtibi Mehmed Çelebi b. Nasuh mahzarlarında, Meson Kalesi mahallâtından Câmi‘ mahallesi sükkânından Receb b. Hamza’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûr, bundan akdem mahmiye-i Kostantıniyye mahallâtından Kalenderhâne mahallesinde vefât eden ve muhallefâtı Beytülmâl-i mezbûr tarafından zabt edilen el-Hâc Mehmed b. Menteş nâm bezzâzın zevi’l-erham-ı muharrem cihetinden vârisidir. Şu cihetle ki, müdde‘î-yi mezbûr, müteveffâ-yı mezkûrun bundan akdem fevt olan ana-baba bir kız kardeşi Ümmi bt. Menteş nâm hatunun sadrî oğludur. Verâseti münhasıran müdde‘î-yi merkūma ve müteveffâ-yı mesfûrun zevcesi Fâtma bt. Abdullah’a âiddir. İkisinden gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye. Hâkim-i muvakkı‘ a‘lâhu mûcebince hükmetti. Bu hüküm hâlen Kal‘a-i Meson kādısı olan kādı Mevlânâ Mehmed b. Bâli kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Fî 1 Zilka‘de sene 964 Şuhûdü’l-hâl: Sinan b. Abdullah, Hüseyin b. Pîrî