Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 106 Hüküm no: 108 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Hoce Gazal’ın karısı Todora bt. Cani Marmarine’ye mehrinin karşılığının ödenmesi Vech-i tahrîr oldur ki, Dergâh-ı mu‘allâ çavuşlarından fahrü’l-emâsil Yunus b. Ali sâbıkâ kasaba-i Ruha’dan (Urfa) Hoce Gazal nâm müteveffâ Ermeni’nin vasiyy-i muhtârı olan Bedros b. Bedir nâm zimmî muvâcehesinde ikrâr ve i‘tirâf ve takrîr-i kelâm kılıp dedi ki: Müteveffâ-yı mezkûrun zevcesi olan Todora bt. Cani Marmarine nâm avretin mehr-i müeccelinden müteveffâ zevci zimmetinde bâkī kalan havâle olduğum bin iflori (filori) için kasaba-i mezbûrede vasiyy-i mezkûr yedinden yedi yüz sikke-i nakd iflori ve bir altın devât ve bir altın hançer cümlesinin vezni yüz yirmi miskāl olur alıp kabz edip mezbûre Todora’nın vekîli olan Şemayil b. Yasef nâm Yahudi’ye zikr olan hançeri ve devâtı ve altmış üç sikke altından mâ‘adâ altı yüz elli yedi altını teslîm eyledim dedikte bi’l-müvâcehe mukırr-ı mezkûru vasiyy-i mezbûr ve vekîl tasdîk eylediklerinde mâ-vaka‘a kayd olundu. Ve mezkûr çavuş mezkûr vasînin yedinden ücret-i kadem iki bin altın alıp kabz eyledim deyu ikrâr ettiği bi’t-taleb kayd olundu. Fî evâsıtı Zilhicce sene 964. Şuhûdu’l-hâl: İbrahim b. Mustafa, İbrahim b. Mehmed, Ali el-müezzin, Hüseyin b. Mehdi, İbrahim b. Mahmud, Mehmed b. Hüseyin, Şaban b. Hüseyin, Nasır b. İskender.