Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 108 Hüküm no: 114 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya b. İbrahim’in muhallefatında tarafların anlaştığı Oldur ki, Sinan bin İbrahim meclis-i şer‘-i şerîfe gelip karındaşı Mehmed mahzarında bundan akdem fevt olan karındaşı Yahyâ kızları Emine ve Kamer ve zevcesi Şemse bt. Emir Mehmed kıbelinden husûs-ı âtiyeyi tasdîka Mehmed b. İbrahim ve İbrahim b. Durmuş şehâdetleriyle vekâleti sâbit olan Cafer b. Mehmed nâm kimesne mahzarında ikrâr ve takrîr-i kelâm edip mezbûr karındaşım Yahyâ fevt oldukda zikr olunan Mehmed ve Emine ve Kamer ve Şemse nâm kimesneler muhallefâtına vâzı‘ü’l-yed olmağın mezkûrlar ile müteveffâ-i mezbûrdan bana irsle intikāl eden hisseme müte‘allik mâbeynimizde münâza‘ât-ı kesîre vâki‘ olmuş idi hâliyâ mezkûrların yedinden yedi bin altı yüz nakd akçe alıp kabz edip zimmetlerini cemî‘ da‘vâdan ve eymân ve muhâsamâtdan husûsen mahmiye-i İstanbul’da Hasanpaşa mahallesinde vâki‘ olup İbrahim b. Durmuş mülkü ile ve Nuri b. İbrahim mülkleriyle ve Hasan Paşa Vakfı ile ve tarîk-i âmm ile mahdûd olan eve ve mahmiye-i mezbûrede Sîmkeş mahallesinde vâki‘ olup İskender b. Abdullah mülkü ile ve merhûm [ve] mağfûrun-leh Emir Buhârî Vakfı ile ve tarafeynden tarîk-i âmm ile mahdûd olan bağa müte‘allik da‘vâdan ve bi’l-cümle müteveffâ-i mezbûrun muhallefâtına müte‘allik cemî‘ da‘vâdan zimmetlerini ibrâ ve ıskāt eyledim dedikde mukırr-ı mezbūru vekîl-i mezkūr Cafer bi’l-müvâcehe tasdîk edip mâ-vaka‘a bi’t-taleb kayd olundu. Fî 3 Zilhicce sene 964 Şuhûdü’l-hâl: Ahmed Bey b. Abdullah, Hayreddin b. Bâli, Ahmed b. Yusuf el-imâm.