Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 111 Hüküm no: 120 Orijinal metin no: [20a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Şaban b. Hızır’ın mirasçıları olduğunun anlaşıldığı Ali Bey b. Abdullah nâm sipâhî ve Hamza b. Ahmed nâm kimse emâcid-i ekârim defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Hızır Çelebi b. İlyas ve kâtibi Mehmed Çelebi b. Nasuh mahzarlarında, Prizren kasabası mahallâtından Lupeşye mahallesinde sâkin olan Mahmud ve Ahmed ibney Süleyman b. Hızır b. Gün’den ve yine mahalle-i mezkûreden Kamer bt. Hızır b. Gün’ün kendi nefsinden asâleten ve ana-baba bir kız kardeşi Sitti’den vekâleti şâhideyn-i mezkûreynin şehâdetleri ile sâbit olarak vekâleten, Süleyman b. Hızır b. Gün’ün Mehmed, Ali ve Hüseyin nâm evlâd-ı sigarına vesâyeti şâhideyn-i mesfûreynin şehâdetleri ile sâbit olduktan sonra vesâyeten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iyeyn ve müvekkile ve sigâr-ı mezbûrîn, bundan akdem mahmiye-i Kostantıniyye mahallâtından Kalaycı Hasan mahallesinde fevt olan ve muhallefâtı Beytülmâl-i mezkûrun emîn-i sâbıkı olan Mehmed b. Ali yediyle Hızâne-i âmireye vâsıl olan Şaban b. Hızır b. Gün’ün vârisleridir. Şu cihetle ki, müdde‘iye ve müvekkile-i mezbûreteyn müteveffâ-yı mezbûrun baba bir kız kardeşidir. Müdde‘iyeyn ve sigâr-ı mezbûrîn müteveffanın baba bir erkek kardeşi çocuklarıdır. Verâseti onlara münhasırdır. Onlardan gayrı vârisi ma‘lûmumuz değildir. Şehâdeten şer‘iyyeten makbûleten gıbbe ri‘âyeti şerâiti’l-kabûl. Hâkim-i muvakkı‘ a‘lâhu mûcebince hükmetti. Bu hüküm günün kasaba-i mezkûre kādısı Mevlânâ Ali b. Seferşâh kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fî 17 Zilhicce sene 964 Şuhûdü’l-hâl: Mustafa b. Mehmed, Ferruh b. Abdullah, Timur b. Mahmud