Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 113 Hüküm no: 124 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ermeni Hoce Gazal’ın muhallefatının karısının vekîli olan Yahudi Şemayil b. Yasef’e teslimi Dergâh-ı mu‘allâ çavuşlarından fahrü’l-akrân Yunus Çavuş b. Ali meclis-i şer‘-i şerîfe gelip bundan akdem kasaba-i Urha’da (Urfa) mürd olan Hoce Gazal nâm Ermeni’nin vasiyy-i muhtârı olan Bedros b. Bedir nâm Ermeni mahzarında ikrâr ve takrîr-i kelâm edip müteveffâ-i mezkûrun zevcesi olan Todora bt. Cani Marmarine nâm Ermeni’nin müteveffâ-i mezbûr zevci zimmetinde mehr-i müeccelinden bâkī kalan bin floriyi kabz için mahmiye-i İstanbul’da havâle ta‘yîn olunduğum hasebiyle kasaba-i mezbûra varıp meblağ-ı mezbûru müteveffâ-i mezkûrun eytâmının haklarını zimemden tahsîl ettikden sonra vasiyy-i mezkûr yedinden yedi yüz sikke nakd iflori (filori) ve bir altın devât ve bir altın hançer alıp kabz edip mezbûre Todora’nın kabza vekîli olan Şemayil b. Yasef nâm Yahudi’ye zikr olan hançeri ve devâtı ve yedi yüz sikke altından dahî altı yüzyedi otuz yedi altını teslîm eyledim ve eytâm-ı mezbûrun zimemden haklarını tahsîl ettiğim için mezbûru vasiyy-i mezkûr yedinden iki yüz iflori (filori) dahî ücret aldım dedikde mukırr-ı mezbûru mezbûrân vasî ve vekîl bi’l-müvâcehe tasdîk edip mâ-vaka‘a bi’t-taleb kayd olundu. Fî evâsıtı Zilhicce sene 964. Şuhûdu’l-hâl: el-Hâc Abdullah b. Abdullah, Bâlî Bey b. Abdullah, İbrahim b. Mustafa, Mustafa b. Durmuş, Mustafa b. Mehmed, es-sabbâğ.