Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 126 Hüküm no: 157 Orijinal metin no: [24b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa b. Mehmed Bey’in iki evini Ali Ağa b. el-Hâc Mustafa’ya sattığı Emîrü’l-ümerâi’l-kirâm kebîrü’l-küberâi’l-fihâm zü’l-fazli ve’l-ihtirâm hâvi’l-meâsir ve’l-me‘âlî el-mahsûs bi-sunûfi avâtıfi’l-meliki’l-müte‘âlî Hazreti Mustafa Paşa b. merhûm Mehmed Bey emîrü’l-ümerâi fî vilâyeti Rumeli el-ma‘mûre kıbelinden ikrâr-ı bey‘a ve kabz-ı semene vekâleti fahrü’l-akrân Mahmud b. Bayram el-kāid ve fahrü’l-emâsil Hasan b. Şaban el-kāid nâm kimselerin şehâdetleri ile sâbit olan fahrü’l-emâsil ve’l-akrân Ali Bey b. merhûm Mustafa Bey meclis-i şer‘-i şerîf ve mahfil-i dîn-i münîfe gelip şöyle ikrâr ve i‘tirâf eyledi ki, müvekkil-i mûmâ ileyhi Mustafa Paşa işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahmiye-i Kostantıniyye mahallâtından Balaban Ağa mahallesinde kâin, dâhilî ve hâricî muhavvatayı hâvî, muhavvata-i dâhiliyesi yedi fevkānî ve tahtânî hâneyi, sofayı, serdâbı, üç kenefi, hamamı, mutfağı, su kuyusunu, cüneyneyi müştemildir, muhavvata-i hâriciyesi tahtânî ve fevkānî on bir odayı, sofayı, anbarı, kasrı, su kuyusunu, bahçeyi müştemildir, bir taraftan Süleyman Baba Vakfı, bir taraftan Mustafa Çelebi b. Ali en-nakkāş mülkü, bir taraftan Haydar Ağa Vakfı ile mahdûd cemî‘ menzilini ve mezbûr Haydar Ağa cânibindeki bir kıt‘a arâzisini senevî yüz otuz akçeye ve yine mahmiye-i mezkûre mahallâtından Camcı mahallesinde vâki‘, fevkānî ve tahtânî on dört hâneyi, dört sofayı, su kuyusunu, mutfağı, ahırı, fırını, üç kenefi, bahçeyi ve avluyu hâvî, bir taraftan merhûm Hemdem Çelebi evlâdı mülkü, bir taraftan Defterdâr Mustafa Çelebi Vakfı, bir taraftan da tarîk-ı âm ile mahdûd bulunan cemî‘ menzilini cümle hudûdu ve kâffe-i hukukuyla râyicü’l-vakt tâmmü’l-vezn sahîhü’l-ayâr altı bin yedi yüz otuz üç sikkeye râfi‘ü hâzihi’s-sahîfeti’ş-şer‘iyye ve zâke’l-vesîkati’l-mer‘iyye, kıdvetü’l-ekârim ve’l-ekâbir hâvi’l-mekârim ve’l-meâsir zi’l-kadri’r-refî‘ ve’l-câhi’l-menî‘ ve’l-vâsıku bi-inâyeti meliki’l-alî Hazreti Ali Ağa b. merhûm el-Hâc Mustafa’ya bey‘ etti. Mezbûr Ali Ağa da ondan iştirâ eyledi. Müşterî-yi mûmâ ileyh kıbelinden tasdîka vekâleti Mevlânâ Pîrî b. Musa Halife ve Ahmed b. Ali es-serrâc nâm kimselerin şehâdetleri ile sâbit olan fahrü’l-a‘yân Ahmed Çelebi b. Abdi vâki‘ ikrârı bi’l-müvâcehe tasdîk etti. Cerâ fî 13 Muharrem sene 965 Şuhûdü’l-hâl: Hüseyin b. el-Hâc İlyas, Kasım Bey b. Abdullah, Sinan Bey b. Abdullah, Hasan Ağa b. Abdullah, Ferhad Ağa b. Abdullah, Ali Bey b. Abdullah, Abdi Ağa b. Abdülcebbar, Geylan Ağa b. Abdullah, Abdi b. Ahmed, Ahmed b. Ali