Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 126 Hüküm no: 156 Orijinal metin no: [24b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen el-Hâc Mustafa b. Nasuh’un vârislerinin kız ve erkek kardeşleri olduğu Mahmiye-i Kostantıniyye mahallâtından Debbağ Yunus mahallesinden el-Hâc Hasan b. İskender ve yine mahmiye-i mezbûre mahallâtından Üsküblü mahallesinden Musa b. Ali nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Hızır Çelebi b. İlyas ve kâtibi Mehmed Çelebi b. Nasuh mahzarlarında, kendi nefsinden asâleten, Ziynet bt. Nasuh nâm kız kardeşi kıbelinden vekâleten, Güre kazâsı tevâbi‘inden karye-i Erkarya sükkânından Sevindik b. Nasuh’tan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûr Sevindik ve müvekkile-i mezkûre, bundan akdem mahmiye-i mesfûre mahallâtından Şeyh Vefâ mahallesinde fevt olan ve muhallefâtı Beytülmâl-i mezbûr tarafından zabt edilen el-Hâc Mustafa b. Nasuh’un vârisleridir. Şu cihetle ki, mezkûr Sevindik müteveffâ-yı mezbûrun erkek kardeşidir. Mesfûre Âişe ise onun kız kardeşidir. İkisinden gayrı vârisi ma‘lûmumuz değildir. Şehâdeten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim-i muvakkı‘ a‘lâhu mûcebince hükmetti. Bu hüküm günün kasaba-i mezkûre kādısı Mevlânâ Fazlullah kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fî 15 Muharremi’l-harâm li-sene 965 Şuhûdü’l-hâl: Bayezid b. Yusuf el-müezzin ve Mevlânâ Mehmed b. Şeyh Davud