Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 128 Hüküm no: 159 Orijinal metin no: [25a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Ali b. Seydi Ahmed’in verâsetinin erkek ve kız kardeşine ait olduğu Mahmiye-i Kostantıniyye mahallâtından Timurtaş mahallesinden el-Hâc Mehmed b. Şeyhî ve yine mahmiye-i mezbûre mahallâtından Mesih Paşa mahallesinden Pîr Veli b. Süleyman nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Hızır Çelebi b. İlyas ve kâtibi Mehmed Çelebi b. Nasuh mahzarlarında, kendi nefsinden asâleten, Bula bt. Seydi Ahmed b. Ubeyd kıbelinden vekâleti şâhideyn-i mezkûreynin şehâdetleri ile sâbit olarak el-Hâc Arab mahallesi sükkânından Ali b. Kasım’dan vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, mezkûr Ali ve mezbûre Bula bundan akdem mahmiye-i mesfûrede vâki‘ Timurtaş mahallesinde fevt olan ve muhallefâtı Beytülmâl-i mezbûr tarafından zabt edilen Ali b. Seydi Ahmed b. Ubeyd’in vârisleridir. Şu cihetle ki, müdde‘î-yi mezkûr Ali, müteveffâ-yı merkūmun ana-baba bir erkek kardeşidir. Müvekkile-i mezkûre de müteveffâ-yı mezbûrun ana-baba bir kız kardeşidir. Verâseti ikisine münhasırdır. İkisinden gayrı vârisi ma‘lûmumuz değildir. Şehâdeten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim-i muvakkı‘ a‘lâhu mûcebince hükmetti. Bu hüküm günün kasaba-i mezkûre kādısı Mevlânâ Ahmed kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fî 18 Muharremi’l-harâm li-sene 965 Şuhûdü’l-hâl: Sefer b. el-Hâc Hasan el-müezzin ve Ali b. Veli min mahalle-i Timurtaş ve Süleyman [b.] Bayezid