Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 146 Hüküm no: 200 Orijinal metin no: [30b-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Ermeni Hacaki b. Derder’in vârisinin annesi ve babası olduğu Abdullah b. Mehmed ve Mehmed b. Mahmud ve el-Hâc Mehmed b. el-Hâc İsmail nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, kendi nefsinden asâleten, zevcesi Vekale bt. David el-Ermeniyye kıbelinden vekâleti şuhûd-i mezkûrunun şehâdetleri ile sâbit olan Ermeni Derder b. Asvador’dan vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûr Derder ve müvekkile-i mesfûre Vekale, bundan akdem mahrûse-i Edirne yolunda Söğütlü diye ma‘rûf mevzi‘de fevt olan ve muhallefâtı Beytülmâl-i mezbûr tarafından zabt edilen Haçaki b. Derder’in vârisidir. Şöyle ki, müdde‘î-yi mezbûr, müteveffâ-yı mezkûrun babasıdır. Müvekkile-i merkūme ise onun annesidir. Verâseti ikisine münhasırdır. Onlardan gayrı vârisi ma‘lûmumuz değildir. Şehâdeten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim-i muvakkı‘ a‘lâhu şehâdetleri mûcebince hükmetti. Cerâ zâlike ve hurrire fî 8 Zilhicce 964 Şuhûdü’l-hâl: Himmet b. Ali, Mehmed b. Mahmud, Bâli Bey b. Hamza