Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 157 Hüküm no: 228 Orijinal metin no: [34a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi ve Ali’nin, babalarının verdiği borç sebebiyle Kilârî Sinan b. Abdullah’ta alacakları olduğu Kilârî Hamza b. Abdullah ve Kilârî Mehmed b. Mahmud nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, müteveffâ Mehmed Çelebi’nin Abdi ve Ali nâm evlâdı kıbelinden da‘vâ ve kabza vekâleti şâhideyn-i mezkûreynin şehâdetleri ile sâbit olduktan sonra fahrü’l-akrân Mehmed Bey b. Abdullah’dan vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müvekkileyn-i mezkûreynin, bundan akdem mahrûse-i Edirne mahallâtından Emirşâh mahallesinde fevt olan ve muhallefâtı Beytülmâl-i mezbûr tarafından zabt edilen Kilârî Sinan b. Abdullah’ın zimmetinde bin beş yüz akçe hakkı vardır. Şu cihetle ki, müteveffâ-yı mezbûr babaları Mehmed Çelebi hâl-i hayatında karz-ı şer‘î cihetinden kendisine iki bin akçe vermiş ve sonra beş yüz akçesini tahsîl etmişti. Hîn-i mevtine kadar bâkıye meblağı tahsîl etmedi. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim, müdde‘iyeyn-i mezbûreyne meblağ-ı mezkûru almadıklarına, hibe etmediklerine, havâle etmediklerine, bi-vechin mine’l-vücûh ve sebebin mine’l-esbâb haklarının kısmen veya tamamen sâkıt olmadığına dâir yemîn verip meblağ-ı merkūmun edâsına hükmetti. Cerâ zâlike ve hurrire fî 25 Rebî‘i’l-âhir el-mübârek sene 965 Allahümme bârik lenâ ve li-sâiri’l-müslimîne ecma‘în Şuhûdü’l-hâl: Cafer b. Tursun, Mehmed b. Ahmed, Bâli Bey b. Hamza, Ahmed b. Süleyman