.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 147
Hüküm no: 146
Orijinal metin no: [28b-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Geldiklan nâhiyesi Karık köyü mâlikânesi hissesi ile Çat Zaviyesi zâviyedarlığı hissesine mutasarrıf olan Seyyid Mehmed Ârif ve Seyyid İbrahim kardeşlerin kaybettikleri beratlarının yenilenmesi

Sâdır olan fermân-ı âlîlerine imtisâlen işbu arz ve derkenâra nazar olundukda medîne-i Amasya kazâsına muzâfe Geldiklan nâhiyesinde Karık nâm-ı diğer Hotini karyenin mâlikânesiyle Çat Zâviye[si]’nin dört sehmden [29a] üç sehmi evlâd-ı zükûruna şart ve ta‘yîn ve bir sehmi dahi kazâ-i mezbûra tâbi‘ Çat Zâviyesi’nin zâviyedârlığına meşrûta olup ber-mûceb-i şart-ı vâkıf Küçük Arslan evlâdlarından sahib-i arzuhâl es-Seyyid Mehmed Ârif ve es-Seyyid İbrahim nâm karındaşlar evlâdiyet ve meşrûtiyet üzere bâ-berât-ı şerîf-i âlîşân mutasarrıflar olup yedlerinde olan berat-ı şerîf bi-kazâillâhi te‘âlâ zâyi‘ olduğundan bahisle sahib-i arzuhâl mezbûrân es-Seyyid Mehmed Ârif ve es-Seyyid İbrahim zâyi‘inden kendi hisselerine müceddeden bir kıt‘a berat-ı şerîf-i âlîşân i‘tâ olunmasını işbu arzuhâl ile istid‘â ederler, fi’l-hakīka karye-i mezbûre mâlikânesinin dört sehmden üç sehmine sahib-i arzuhâl mezbûrân es-Seyyid Mehmed Ârif ve es-Seyyid İbrahim müstakillen ve bir sened ile Çat Zâviyesi’nin altı sehm i‘tibârıyla dört sehmi yine sahib-i arzuhâl mezbûrân es-Seyyid Mehmed Ârif ve es-Seyyid İbrahim ibney Mehmed İzzet ve bâkī iki sehm dahi derûn-ı derkenârda mezkûrü’l-ism Seyyid Mustafa ve es-Seyyid Ahmed ibney Seyyid Mehmed karındaşların ber-mûceb-i kuyûd üzerlerinde başka başka beratla olduğu askerî rûznâmçesinden müstebân ve merkūm es-Seyyid Mehmed Ârif ve es-Seyyid İbrahim nâm karındaşların mâlikâne-i mezbûrede ber-vech-i iştirâk sahib-i hisse olduklarını kazâ-i mezbûr ahâlîsinden Der-aliyye’de müsâfiren sâkinler Mehmed Ebûbekir ve Hüseyin b. Mustafa nâm mevsûku’l-kelim kimesnelerin ihbârlarıyla sahib-i berat idikleri zâhir ve nümâyân olmağın bu sûretde ber-mûceb-i kuyûd sahib-i arzuhâl es-Seyyid Mehmed Ârif ve es-Seyyid İbrahim ibney es-Seyyid Mehmed İzzet nâm karındaşlara iştirâken zâyi‘den bir kıt‘a berat-ı şerîf-i âlîşân ihsân ve inâyet buyurulmak iktizâ eylediği huzûr.

Fî 2 R sene [12]49