.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 147
Hüküm no: 145
Orijinal metin no: [28b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kayseri’de el-Hâc Mehmed Çelebi b. el-Hâc Mustafa Vakfı’nın mütevellisi Şeyh Seyyid İbrahim’e yapılan müdâhalenin önlenmesi

Sâdır olan fermân-ı âlîlerine imtisâlen işbu arz ve derkenâra nazar olundukda medîne-i Kayseriye’de vâki‘ merhûm Bezirci el-Hâc Mehmed Çelebi b. el-Hâc Mustafa nâm sahibü’l-hayrın vakfının galle ve tevliyeti Halil Çelebi evlâdına ve evlâd-ı evlâdına meşrûta olarak el-yevm eş-Şeyh es-Seyyid İbrahim b. es-Seyyid Mehmed’in bâ-berât-ı âlî tasarufunda olmağla ve tevliyet-i mezkûreye âhardan dahl u ta‘arruz olunmak îcâb etmez iken batn-ı sânîde bulunan es-Seyyid Ârif b. es-Seyyid Abdülbaki mahâllinde bi’d-defa‘ât terâfu‘ olunup merkūm Şeyh İbrahim’in batn-ı evvelde olduğu müdde‘î-i mezbûr es-Seyyid Arif’in batn-ı sânîde olduğu cemm-i gafîr kimesneler şehâdetleriyle vech-i şer‘î üzere bi’ş-şöhre ve’t-tevâtür isbât olunup müdde‘î-i mezbûr es-Seyyid Ârif bi-vechi şer‘î galle ve tedâhüle îcâb üzere mu‘ârazadan men‘ merkūm es-Seyyid Ârif batn-ı evvelde olmadıkça tevliyet ve galle-i vakfa müdâhale ve mu‘âraza etmemesi ba‘dehû bir kıt‘a i‘lâm-ı âlîşân i‘tâsı medîne-i mezbûre nâibi es-Seyyid Mehmed Nafi Efendi dâ‘îlerinin mühr-i mutâbık arzıyla müstefâd ve fi’l-hakīka tevliyet-i mezkûre merkūm es-Seyyid Şeyh İbrahim’in [bâ]-berât-ı âlî üzerinde olduğu derkenârdan müstebân ve i‘lâm-ı mezkûrun mazmûnu şer‘-i şerîfe mutâbık ve muvâfık olmağla ber-mantûk-ı i‘lâm bâlâsı tuğrâ-yı garrâ ile ma‘lûm [mu‘anven] bir kıt‘a emr-i âlîşân ısdârı husûsu re’y-i âlîlerine menût idiği huzûr.