Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 158 Hüküm no: 231 Orijinal metin no: [34b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Nasrânî Dimitri b. Gin’in vârislerinin karısı ve iki oğlu olduğu Mehmed b. Sinan ve Atebe-i aliyye’de sarrâc olan İlyas b. Mustafa nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, Kurd ve Mavrid ibney Dimitri b. Gin nâm sagīreyne kıbel-i şer‘den mansûb vasî olan Nasrânî Yorgi v. Alagöz’den vesâyeti şâhideyn-i mezkûreynin şehâdetleri ile sâbit olduktan sonra vesâyeten ve Hasköy kasabasında mütemekkine olan Nasrâniye Hurşana bt. Şîrmerd’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iye Hurşana ve sagīreyn-i mezkûreyn Kurd ve Mavrid, bundan akdem Hezargrad kazâsı tevâbi‘inden karye-i Bilamarince’de maktûlen fevt olan ve muhallefâtı Beytülmâl-i mezbûr tarafından zabt edilen Nasrânî Dimitri b. Gin’in vârisleridir. Şöyle ki müdde‘iye-i mesfûre Hurşana, müteveffâ-yı mersûmun öldüğünde taht-ı nikâhında bulunduğu zevcesidir. Sagīreyn-i mezkûreyn ise onun sulbî oğullarıdır. Verâseti onlara münhasırdır. Onlardan gayrı vârisi ma‘lûmumuz değildir. Şehâdeten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim-i muvakkı‘ a‘lâhu şehâdetleri mûcebince hükmetti. Bu hüküm günün kasaba-i mezkûre kādısı Mevlânâ Ali b. Lütfullah kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fî 8 Rebî‘ülâhir sene 965 Şuhûdü’l-hâl: Hüseyin b. İlyas ve Hızır b. Mahmud, Davud b. Yunus ve Ahmed b. Mehmed