Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 159 Hüküm no: 232 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hızır ile Beşaret Bey b. Hızır’ın çiftlik ve değirmen satışındaki davada sulh oldukları Sebeb-i tahrîr-i hurûf oldur ki, Hasan b. Hızır nâm kimesne meclis-i şer‘-i şerîfe gelip zübdetü’l-emâcid ve’l-ekârim Beşaret Bey b. Hızır nâm za‘îm mahzarında ikrâr ve takrîr-i kelâm edip bundan akdem merhûm babam Hızır Voyvoda hâl-i hayâtında Saray tevâbi‘inde Ösek nâm karye sınırında mutasarrıf olduğu çiftlik ve Zudimle suyu üzerinde dâyir olan değirmenin iki buçuk hissesini sâhibine intimâyla ma‘rûf olmağın tahdîd ve ta‘yînden müstağnîdir mezkûr Beşaret Bey’e beş bin akçeye bey‘ edip teslîm-i mebî‘ dahî etmiş ba‘dehû babam fevt olup teslîm-i semen etmedin deyu mezkûr Beşaret Bey ile münâza‘a ve muhâsama etmiş idim. Hâliyâ mesfûrun yedinden iki bin râyicü’l-vakt akçe alıp zimmetini ibrâ eyledim cemî‘ da‘vâdan ve eymân ve muhâsamatdan husûsen mezkûr çiftliğe müte‘allik da‘vâdan ibrâ-i âmm ile ibrâ ve ıskāt eyledim dedikde mukırr-ı mezbûru akvâl-ı meşrûhunun cemî‘sinde mukarrun-leh mezkûr bi’l-müvâcehe tasdîk ettikde bu vesîka-i enîka bi’t-taleb ketb olundu yed-i tâlibe def‘ olundu ki lede’l-ihtiyâc ihticâc edene. Tahrîren fî 8 Rebî‘ülâhir sene 965. Şuhûdü’l-hâl: Mustafa Çelebi b. Koçi Bey es-sipâhî, Nasûh b. Abdullah es-sipâhî, İnehan Bey b. Abdullah es-sipâhî.