Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 165 Hüküm no: 247 Orijinal metin no: [36b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Mehmed’in, terekesi Beytülmâl tarafından zabt edilen kocasında mehr-i müeccel alacağı kaldığı İbrahim b. Musa ve Mehmed b. Sinan nâm kimseler emâcid-i mükerremîn defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, Saliha bt. Mehmed’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘iye-i merkūmenin, bundan akdem mahrûse-i Edirne mahallâtından Baba Timur mahallesinde fevt olan ve muhallefâtı Beytülmâl-i mezbûr tarafından zabt edilen ve öldüğünde taht-ı nikâhında bulunduğu Şerbetçi Ali b. Abdullah nâm zevcinin zimmetinde mehr-i müecceli cihetinden bin akçe hakkı vardır. Verâseti mezbûre Saliha’ya münhasırdır. Ondan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim, müdde‘iye-i mezbûreye meblağ-ı mezkûru almadığına, hibe etmediğine, havâle etmediğine, bi-vechin mine’l-vücûh ve sebebin mine’l-esbâb hakkının kısmen veya tamâmen sâkıt olmadığına dâir yemîn verip meblağ-ı merkūmun edâsına hükmetti. Cerâ zâlike ve hurrire fî 15 Rebî‘ülâhir sene 965 Şuhûdü’l-hâl: Osman b. İzzeddin, Mehmed b. Kasım, Bâli Bey b. Abdullah