|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 148 Hüküm no: 148 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sivas’taki Şifaiye Medresesi mütevellisi Seyyid Mustafa Halîfe’nin vefatıyla tevliyetin torunu Seyyid Mehmed Halîfe’ye tevcihi
Sâdır olan fermân-ı âlîlerine imtisâlen medîne-i Sivas nâibi Müftizâde es-Seyyid Ahmed Efendi dâ‘îlerinin işbu sene-i mübâreke Recebi’l-müreccebin yirmi yedinci günü târihiyle müverrah mühr-i mutâbık arzıyla derkenârlara merbût olan arzuhâl zuhûruyla sadr-ı Anadolu-yı sâbık fazîletlü inâyetlü Yahyazâde Mehmed Said Efendi hazretlerinin şehr-i sâbık Zilka‘deti’ş-şerîfesi’nin yirmi dokuzuncu günü târihiyle müverrah i‘lâmına nazar olundukda medîne-i mezbûrede vâki‘ Şifâiye Medresesi Vakfı’nın iki ve bir rub‘ hissesine tevliyet cihetine bâ-berât-ı şerîf-i âlîşân mutasarrıf olan es-Seyyid Mustafa Halîfe bilâ-veled fevt olup hisse-i tevliyet-i mezkûre mahlû[l] olmağla mahlûlünden sulbî oğlunun oğlu erbâb-ı istihkākdan es-Seyyid Mehmed Halîfe b. es-Seyyid Abdurrahman’a tevcîh olunması meâl-i arz-ı mezkûrdan müstebân olmağla ve hisse-i mezkûre-i tevliyet müteveffâ-yı mezbûrun mahlûlünden ecânibden diğer es-Seyyid Mehmed b. Abdullah’a bâ-arzuhâl tevcîhi husûsu irâde-i seniyyeye menût idiği zahr-ı arzuhâlde muharrer i‘lâm-ı mezkûrdan nümâyân ise de hisse-i tevliyet-i mezkûre mezbûr? kimesneye tevcîh olmayıp şurût-ı müteveffâ-yı mezbûr es-Seyyid Mustafa Halîfe üzerinde olduğu derkenârdan müstebân ve tarafeyn Der-aliyye’de mevcûd bulunduğundan huzûr-ı şer‘a celb ve tevcîh-i pâdişâhî olmadığından hissesine tevliyet-i mezkûreye şer‘an dahl ü ta‘arruz îcâb etmediği mezbûr diğer es-Seyyid Mehmed’e tefhîm ve hisse-i tevliyet-i mezkûreye müteveffâ-yı mezkûr es-Seyyid Mustafa Halîfe’nin oğlunun oğlu merkūm es-Seyyid Mehmed Halîfe ecânibden elyak ve müstehık olduğu medîne-i mezbûre ahâlîsinden ve bî-garaz erbâb-ı vukūfdan Mehmed Emin b. Mehmed ve Ali b. el-Hâc Abdullah nâm kimesneler dahi haber vermeleriyle bu sûretde hisse-i tevliyet-i mezkûre ber-mûceb-i arz müteveffâ-yı mezbûr es-Seyyid Mustafa Halîfe’nin mahlûlünden oğlunun oğlu merkūm es-Seyyid Mehmed Halîfe’ye tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i âlîlerine menût idiği huzûr.
|