Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 149 Hüküm no: 149 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu’da Honsalar Camii Vakfı mütevellilerinden Hasan Halîfe’nin vefatıyla hissesinin akrabası Seyyid Hafız Mehmed’e tevcihi Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da medîne-i Kastamonu’da vâki‘ Honsalar Câmi‘-i şerîfi Vakfı’nın vazîfe-i mu‘ayyene ile tevliyet cihetine bâ-berât-ı âlî mutasarrıflar Hasan ve Abdullah ve Hacı Abdullah nâm müştereklerden merkūm Hasan bilâ-veled fevt olup yeri hâlî kaldığından bahisle müteveffâ-yı merkūmun akrabâsı sahib-i arzuhâl es-Seyyid Hâfız Mehmed müteveffâ-yı merkūmun hissesini kendüye tevcîh ve yedine berat-ı şerîf-i âlîşân i‘tâ olunmasını işbu arzuhâl ile istid‘â eder, fi’l-hakīka tevliyet-i mezbûrun sülüs hissesi Hasan Halîfe ve sülüs hissesi dahi Abdullah ve sülüs hissesi dahi diğer Abdullah Halîfe üzerlerinde olduğu Anadolu Muhâsebesi’nden muhrec derkenârlardan müstebân ve merkūm Hasan Halîfe’nin bilâ-veled fevti vâki‘ idiği ve sahib-i arzuhâl merkūm es-Seyyid Hâfız Mehmed’in umûr-ı vakfı rü’yete a‘lem olduğu kazâ-i mezbûr ahâlîlerinden Der-aliyye’de müsâfiren sâkinler es-Seyyid Ahmed b. Mustafa ve Mehmed b. Mehmed nâm kimesneler şehâdetleriyle zâhir ve nümâyân olmağın tevliyet-i mezbûrun sülüs hissesi müteveffâ-yı merkūmun bilâ-veled mahlûlünden sahib-i arzuhâl es-Seyyid Hâfız Mehmed b. Mehmed’e tevcîh ve yedine berat-ı şerîf-i âlîşân inâyet ve ihsân buyurulmak re’y-i sâmîlerine menût idiği huzûr.