Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 151 Hüküm no: 152 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karahisar-ı sahib kazasındaki Cami-i Şerif-i Kebîr Vakfı’nın nezaret ve kitabetine mutasarrıf Mustafa’nın vefatıyla bu görevlerin oğlu İbrahim’e tevcihi Sâdır olan fermân-ı âlîlerine imtisâlen işbu arz ve derkenâra nazar olundukda medîne-i Karahisar-ı sahib kazâsında vâki‘ Câmi‘-i Şerîf-i Kebîr Vakfı’nın yevmî dört akçe vazîfe ile nezâret ve kitâbet ve merkūmân cihetleriyle mutasarrıf olan Mustafa b. el-Hâc Mehmed fevt olup cihât-ı mezbûrân vazîfe-i mersûmesiyle sulbî oğlu derûn-ı arzda ism-i mezkûr İbrahim’e tevcîh olunmak iktizâ eder iken ecânibden Mahmud b. el-Hâc Ali müteveffâ-yı mezbûrun sulbî oğlu İbrahim’i ketm ve ihfâ ederek bir-takrîb kazâ-i mezbûr nâibi esbak Ebûbekir Efendi’den aldığı bir kıt‘a arz ve mûcebince kendüye tevcîh-i berat ettirmiş ise de bu def‘a kazâ-i mezbûr nâibi Halil Efendi dâ‘îlerinin işbu mühr-i mutâbık arzında cihât-ı mezkûre merkūm Mahmud’un ref‘inden babası müteveffâ-yı merkūm Mustafa’nın mahlûlünden sulbî kebîr oğlu İbrahim’e tevcîh olunmasını inhâ etmeğin fi’l-hakīka [30a] müteveffâ-yı mezbûrun mahlûlünden ecânibden Mahmud b. el-Hâc Ali’ye tevcîh olunup üzerinde olduğu derkenârdan müstebân ve merkūm İbrahim müteveffâ-yı mezbûr Mustafa’nın sulbî kebîr oğlu olduğu Der-aliyye’de müsâfiren sâkinler es-Seyyid Mehmed Şemseddin Efendi b. es-Seyyid Ali ve Mehmed Emin b. Yusuf nâm mevsûku’l-kelim kimesnelerin alâ-tarîkı’ş-şehâde haber vermeleriyle zâhir ve mütehakkık olmağın bu sûretde cihât-ı mezkûre vazîfe-i mersûmesiyle merkūm Mahmud’un ref‘inden ve babası müteveffâ-yı mezbûrun mahlûlünden merkūm İbrahim’e tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine.