Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 163 Hüküm no: 169 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hâce Fatma Hatun’un, Tokat halkından vefat eden babası Bekiroğlu Derviş Mehmed Bey’in terekesini el koyanlardan almak istemesi Ma‘rûz, Sâdır olan fermân-ı âlîlerine imtisâlen mübârek rikâb-ı kamer-tâb-ı husrevâneye takdîm olunan bir kıt‘a arzuhâl ve derkenâra ba‘de’n-nazar medîne-i Tokat sâkinlerinden olup kırk sene mukaddem fevt olan pederi Bekiroğlu Derviş Mehmed Bey’in medîne-i Tokat’da vâki‘ bi’l-cümle urûz ve akār terekesini mahâllinde vâzı‘u’l-yed olanlardan taleb ve da‘vâ zımnında bâ-fermân-ı âlî ve bâ-mektûb-ı sâmî medîne-i mezbûra varıp huzûr-ı şer‘de tereke-i müteveffâ-yı mezbûra vâzı‘u’l-yed olan Latîfoğlu nâm kimesneden kendisi bi’l-mutâlebe kerhen sulh olup ol vechile kendüye gadr-i küllî olduğundan bahisle pederinin mâlını mahâllinde zabt için yedine bir kıt‘a fermân-ı âlîşân sudûrunu sahibe-i arzuhâl Şerife Hâce Fâtıma câriyeleri istid‘â-yı inâyet eder, fi’l-hakīka sahib-i arzuhâl takrîr-i meşrûhu üzere ikrâh-ı mu‘teber ile sulh olduğu mahzar-ı hasmda ber-nehc-i şer‘î tahakkuk eder ise yedinde olan fetvâ-yı şerîfe mûcebince sulh gayr-ı sahîh olup ânın için tekrar mutâlebe etmek emr-i meşrû‘ olmağla bu sûretde tekrar medîne-i mezbûra varıp tereke-i müteveffâ-yı mezbûra vâzı‘u’l-yed olanlardan babasının urûz ve akār ve nükūd terekesini ma‘rifet-i şer‘le taleb ve da‘vâ zımnında sahibe-i arzuhâl Şerife Hâce Fâtıma Hatun yedine bir kıt‘a emr-i celîlü’l-kadr i‘tâsı menût-ı re’y-i âlîleri idiği huzûr-ı âlîlerine i‘lâm olundu. Fî 27 N sene [12]49